Өмірден өтер алдында үйдегілерден 5000 теңге аударуды сұраған: Маңғыстауда шекарашы сарбаздың мәйіті табылды

19 жастағы әскери қызметшінің мәйіті бүгін таңертең табылған. Ұлттық қауіпсіздік комитетінің шекара қызметі істің мән-жайы анықтап жатыр. Алдын ала мәліметтер бойынша, жас жігіт өзіне қол жұмсаған, деп хабарлайды Stan.kz ақпарат агенттігі.

Маңғыстау облысындағы Бейнеу шекара бекеті сарбазының қаза болғаны туралы ақпарат әлеуметтік желіде жарияланған. Белсенді Азамат Сәрсенбаев:
"Бүгін Маңғыстау облысында таңғы сағат 5-те шекара әскерінің сарбазы асылып өлген күйінде табылды. 2003 жылы туған жігіт – Түркістан облысының тұрғыны", – деп жазды.

• Қостанай облысында гастритпен ауыратын жігітті әскерге алып кетті: ол сотқа арызданды


• "Ұлымыздың өлі-тірі екенін білмейміз": Жамбыл облысында көз жұмған сарбаздың өліміне күдікті ретінде ұсталған жігіттің отбасы аштық жариялады

Қатардағы жауынгер Еділ Тешебаевтың ағасы Нұржаусын Тешебаев інісінің қазасы туралы хабарды бүгін таңертең алғанын айтады.

Айтуынша, мойнында екі белдіктің ізі болған. Сонымен қатар қойын дәптерінен ата-анасына, ағалары мен туыстарына арналған жеке-жеке жазба табылған. Қайтыс болар алдында ол үйдегілерден 5000 теңге аударуды сұраған, ағасы 500 теңгесі ғана барын айтып, салып жіберген екен.

Қазақстан Ұлттық қауіпсіздік комитетінің шекара қызметі қазіргі уақытта қызметтік тергеу жүріп жатқанын мәлімдеді.