2023 жылы Құрбан айт мерекесі қай күні тойланады
2023 жылы қасиетті Құрбан айт мерекесі 28 маусымда басталатыны белгілі болды, деп хабарлайды Stan.kz ақпарат агенттігі.
Қазақстан мұсылмандары діни басқармасының шариғат және пәтуа бөлімі 2023 жылғы діни күндер кестесін бекітті.
Кестеге сәйкес, Құрбан айттың бірінші күні 28 маусымда басталып, 30 маусымда (үшінші күні) аяқталады.
Құрбан айттың негізгі мақсаты – Алла разылығы үшін құрбандыққа мал шалу. Бұл мереке қарсаңында миллиондаған мұсылмандар Арафат жазығында құлшылық етіп, дұға оқиды.
"Құрбан" сөзі араб тілінде "жақындау" дегенді білдіреді, яғни жасаған сауап істер арқылы жүректі тазартып, Аллаға жақындай түсу. Ал діни терминдік мағынасы "шарттарымен санаса отырып, құлшылық ниетімен мал бауыздау" дегенге саяды. Құрбан айтта құрбандыққа мал шалу — Ханафи мәзһабында шамасы жеткендерге ғана уәжіп, яғни міндет.
Айта кетсек, Рамазан айы 2023 жылы 23 наурызда басталады.
Қадір түні 17 сәуірден 18 сәуірге қараған түнге түсіп тұр. Ал Ораза айт – 21 сәуір.