Тоқаев пен Путин келіссөздер жүргізу үшін Ақордада кездесті
"Ақорда" резиденциясында Қазақстанға ресми сапармен келген Ресей президенті Владимир Путинді салтанатты түрде қарсы алу рәсімі өтті. Бұл жөнінде Stan.kz ақпарат агенттігі Ақорда таратқан ақпаратқа сүйеніп хабарлайды.
Қасым-Жомарт Тоқаев пен Владимир Путин бір-біріне ресми делегация мүшелерін таныстырды. Дәстүр бойынша резиденцияға екі елдің министрлер кабинетінің мүшелері жиналды. Құрмет қарауыл ротасының басшысы екі ел басшыларына құттықтау рапортын беріп, Қазақстан мен Ресейдің мемлекеттік әнұрандары шырқалды. Бір-бірінің қолын алған президенттер ары қарай кездесуді шектеулі құрамда жалғастырды.
Қазақстан президенті энергетика саласындағы ынтымақтастық деңгейінің артып келе жатқанын атап өтті. Мемлекет басшысының айтуынша, жақында Ресей газының Қазақстан аумағы арқылы Өзбекстанға транзитінің басталуы ел үшін маңызды оқиға болды. Бұл жоба Орталық Азиядағы аймақтық тұрақтылық пен энергетикалық қауіпсіздікті нығайтуда маңызды рөл атқарады.
- Қостанайда Путин қатысатын форумды өткізуге 13 миллиард теңге жұмсалған
- Путин Мәскеудің Қазақстан үшін АЭС жобасын жасауға дайын екенін мәлімдеді
Тоқаев сондай-ақ азық-түлік қауіпсіздігін қамтамасыз етуде екі елдің күш-жігерін бірлесіп үйлестірудің маңыздылығын атап өтті. Дүние жүзінде аштық пен азық-түлік тапшылығы бар адамдардың саны 830 миллионға жеткен. Сондай-ақ президент
“БҰҰ 2050 жылға қарай әлем халқы тағы 2 миллиард адамға өседі деп болжайды. Сарапшылардың пікірінше, ЕАЭО елдерінің өндірістік, ресурстық және экспорттық әлеуетін толық іске асыру 600 миллионға жуық адамды тамақтандыруға, сөзбе-сөз айтқанда азықтандыруға мүмкіндік береді. Және бұл болжамдар өте шынайы”, – деді Тоқаев сөйлеген сөзінде.
Ол Қазақстанда соңғы бес жылда ауыл шаруашылығының жалпы ішкі өнімінің көлемі екі еседен астам өскенін айтты. Ауыл шаруашылығы экспорты да екі есеге өсіп, 6 миллиард долларға жуықтаған.