“10 наурыз күні "Шымбұлақ" курортына келген шаңғышы қар көшкінін түсіретін құралмен соқтығысып, салдарынан қар көшкінінің астында қалып, көз жұмды”, – деп хабарлайды Шымбұлақ” тау курортының әкімшілігі.

10:58-де курорттық құтқарушыларға Комби-2 тірегінің 8-ден жоғары аймағында қар көшкіні жүріп жатқаны туралы ақпарат түскен. Марқұм көшкінге қарсы құрылғыға соғылған.

“Оқиға орнына сағат 11:02-де жеткен құтқарушылар шаңғышының дене бөлігін қар көшкінін бөлетін жерден тапты. Құтқару операциясы үш минуттан аспады. Сағат 11:05-те шаңғышының денесі қазып алынды. Ол шаңғы тебуге рұқсат етілген, белгіленген соқпақтардан өтіп, қоршаудың сыртына шығып кеткен. Ер адамның қар көшкініне қарсы қажетті құрал-жабдықтары, атап айтқанда, бипер, бұрғы күрегі болмаған”, – делінген хабарламада.

Сағат 11:25-те ол фельдшерлік-акушерлік пунктке жеткізілді.

“Сағат 11.29-да фельдшерлік пункт қызметкерлері оның көз жұмғанын анықтады. Ер адам қар көшкінімен бетпе-бет келіп, қарды бөлетін құрылғыға барып соғылған. Соның салдарынан бас жарақатын алған”, – дейді Шымбұлақ әкімшілігі

Айта кетейік, бүгін "Қазгидромет" Алматыда ауа райына байланысты ескерту жасаған болатын.

“Жауын-шашынның түсуіне және қар жамылғысының тұрақсыз түсуіне байланысты Кіші және Үлкен Алматы су алаптарында 10-11 наурыз аралығында қар көшкіні жүруі мүмкін. Көшкін жүру қаупі мүмкін болуына байланысты, қарлы тік жартастарға шығуға болмайды. Тауда абай болыңыздар”, – делінген хабарламада.

Талқылау