Семейлік әйел қаржы пирамидасын жарнамалағаны үшін бес жылға бас бостандығынан айырылды
Семейлік әйел қаржы пирамидасын жарнамалағаны үшін бес жылға бас бостандығынан айырылды. Бұл туралы Stan.kz ақпарат агенттігі хабарлайды.
Фото: Pixabay.com
Семей қаласының 57 жастағы тұрғыны Ақтөбе, Атырау, Ақтау, Алматы, Семей, Павлодар қалаларында тұратын басқа тұлғалармен сөз байласып, 2016 жылы Ақтөбе қаласының тұрғыны жасап шығарған смартфон түріндегі ұялы телефон арқылы пайдаланылатын Шығыс Қазақстан облысының тұрғындарына арналған “APPPORT” мобильді қосымшасын жарнамалап, үгіт- насихат жүргізген.
“UNNNITY corporation” ЖШС сайтына жеке бас пайдасын көздей отырып, қаражат тарту мақсатында “APPPORT” мобильді қосымшасын пайдаланушылар кәсіпкерлерге “APPPORT” порталы арқылы белгілі бір мерзімге дейін өз қызметтерін жарнамалауға мүмкіндігі болатынын айтып сендірген.
“UCREDIT” (виртуальді валюта) сатып алу кезінде, сондай- ақ жаңа тұлғаларды тіркеген жағдайда белсенді қатысушыларға қосымша бонус алуға болатыны туралы жалған ақпарат таратқан.
Көптеген азаматтар жарнамаға сеніп, 350 мыңнан 2 миллион теңгеге дейінгі көлемде қаражат салған. Осылайша 2016-2024 жылдар аралығында әйел өзінің таныстарымен бірігіп, 2 мыңға жуық адамды алдап, оларға жалпы сомасы 2,5 млрд теңгеге жуық материалдық шығын келтірген. Сот оны қылмыстық құқық бұзушылықты жасағаны үшін кінәлі деп танып, Қылмыстық кодекстің 217-бабы бойынша қылмыстық іс қозғалып, 7 жыл мерзімге қаржы және коммерциялық ұйымдарда басшылық қызмет атқару құқығынан айыра отырып, 5 жылға бас бостандығынан айыру жазасын тағайындады.
"Сотталған жазасын өтеу үшін Семей қаласындағы ең төменгі қауіпсіздік мекемесіне келді. Қазір ол карантин бөлімінде жатыр. Онымен оқу-түсіндіру жұмыстары жүргізіліп жатыр, карантиндік бөлімнен шыққаннан кейін сот шешімімен талап-арыздарды өтеу үшін ақы төленетін жұмысқа орналасады", – дейді мекеме басшысының орынбасары Дархан Бигазиев.
Еске салсақ, Тоқаев интернет алаяқтық пен қаржы пирамидаларын реттейтін заңға қол қойған еді.