"Салдарын бұрмалап көрсетудің қажеті жоқ": Қазақстан президенті Қаңтар оқиғасын халық көтерілісі деп санамайтынын айтты
Қазақстан президенті Қасым-Жомарт Тоқаев Қаңтар оқиғасын халық көтерілісі, революция деп атайтындарға жауап берді. Президенттің пікірінше, “халық көтерілісі болды деген пікірлер қылмыстық әрекеттерді ақтау үшін айтылуда”. Бұл туралы Stan.kz ақпарат агенттігі Егемен Қазақстан басылымына сілтеме жасап хабарлайды.
Мемлекет басшысы бастапқыдағы бейбіт шерулер жаппай тәртіпсіздікке, өртеу мен қиратуға ұласқан қайғылы оқиғаларға бүкіл әлем куә болғанын айтады.
“Кім бейбіт шеруге автомат, тапанша және суық қару ұстап барады?! Ниеті дұрыс адам әскери қызметшілерді ұрып-соғып, өлтіре ме, оларды тірі қалқан етіп, әкімшілік ғимаратқа шабуыл жасай ма?! Бейбіт шеруде дүкендер мен банктер қиратылып, тоналып, көліктер өртеле ме?! Билік органдарының ғимараттары мен полиция бөлімдеріне жасалған шабуылды айтпай-ақ қояйын”, – дейді Тоқаев сұхбатында.
- "Біз Ресейге емес, ҰҚШҰ ұйымына жүгіндік": Тоқаев Қаңтар оқиғасы кезінде ресейлік әскерилерді шақыру қаншалықты дұрыс шешім болғанын түсіндірді
- "Кеттің бе – қайырылма!": Қасым-Жомарт Тоқаев елді қосарланған билік арқылы басқарғысы келгендер туралы айтты
Ол жаппай тәртіпсіздіктің салдарынан үш миллиард долларға жуық шығын келгенін баса айтады. “Қаңтар оқиғасының себеп-салдарын бұрмалап көрсетудің қажеті жоқ” деген президент “халық көтерілісі болды деген пікірлер қылмыстық әрекеттерді ақтау үшін айтылуда” дейді.
“Барып тұрған бұзақыларды батырға балап, жұртты арандататын әрі жауапкершіліктен жұрдай сыңаржақ пайымдар қылмыстық психологияның қоғам санасына сіңуіне әкеп соқтырады. Мұндай әңгімелер – ұлттық қауіпсіздікке және халықтың жаймашуақ өміріне қатер төндіретін жаппай тәртіпсіздікке шақырумен пара-пар. Бұл – өте қатерлі үрдіс. Сондықтан осындай жүгенсіздікті сынға алу мәселесіне келгенде мемлекет пен қоғамның ұстанымы ортақ болуы керек. Мен бұған сенімдімін”, – дейді Қазақстан президенті.