Қазақстанда екі күн бойы бірқатар өңірде ауа райы құбылмалы болады
Жаздың кейінгі күндері Қазақстанда ауа райы құбылмалы болады. Бір өңірде нөсер мен бұршақ, таулы аймақтарда қар аралас жаңбыр жаууы мүмкін. Бұл туралы Stan.kz ақпарат агенттігі хабарлайды.
"Қазгидромет" болжамына сенсек, солтүстік және шығыс өңірлерге циклон мен атмосфералық фронттар әсер етеді. Осыған байланысты жаңбыр жауып, найзағай ойнайды. Кей жерлерде нөсерлетіп жаңбыр жауып, бұршақ түсіп, дауыл соғуы мүмкін.
Ал шығыс пен оңтүстік-шығыстағы таулы аймақтарда 26-27 тамыз күндері түнде жаңбырдың соңы қар аралас жаңбырға ұласуы ықтимал.
Батыс пен оңтүстік өңірлерде, керісінше, күн негізінен құрғақ болады. Жауын-шашын болмайды.
Соған қарамастан, жаздың соңғы күндерінде еліміздің басым бөлігінде күн жылы болмақ. Солтүстікте күндіз +25…+32 градус, орталық және оңтүстікте +25…+35 градусқа дейін жылынады. Ал шығыста ауа температурасы біртіндеп +20…+31 градусқа дейін көтеріледі.
Еске салайық, бұған дейін Қазгидромет биылғы күзге арналған алдын ала болжамын жариялаған еді. Синоптиктердің мәліметінше, қыркүйекте еліміздің басым бөлігінде ауа температурасы қалыпты деңгейде болады. Ал қазан мен қарашада Қазақстанның көптеген өңірінде күн әдеттегіден жылырақ болып, температура климаттық нормадан 1–2 градусқа жоғарылауы мүмкін. Кейбір солтүстік өңірлерде күздің алғашқы және соңғы айларында жауын-шашын мөлшері нормадан көп болуы ықтимал. Маусымдық болжам кейін қысқа мерзімді болжамдармен нақтыланатынын Қазгидромет те атап өтеді.
