Оралда ресейліктер түнгі клуб маңында төбелес шығарды

Оралда түнгі клубтың жанында Ресей азаматтары төбелесіп қалды. Ішкі істер министрлігі шетелдіктер Қазақстан аумағында заңдылық пен тәртіпті бұзған жағдайда олардың одан әрі біздің елде болу мәселесін қарастыратынын ескертті, деп хабарлайды Stan.kz ақпарат агенттігі Polisia.kz порталына сілтеме жасап.

Оралда полицейлер сырттағы бейнебақылау камераларын бақылап отырып, түнгі клуб маңында ер адамдар арасындағы төбелесті байқаған. Оқиға орнына жеткен полиция жасағы Ресей азаматтарын ұстады. Олар мас күйінде өз араларында төбелес шығарған.

"Тәртіп бұзушыларға қатысты ҚР-ның Әкімшілік құқық бұзушылық туралы кодексінің "Ұсақ бұзақылық", "Қоғамдық орындарға мас күйінде келу", "Тыныштықты бұзу" бойынша әкімшілік хаттамалар толтырылды. Жиналған материал Орал қаласының мамандандырылған әкімшілік сотында қаралатын болады. Құқық бұзушылардың Қазақстан Республикасының аумағында одан әрі болу мәселесі әкімшілік материалдар бойынша түпкілікті шешімдер қабылданғаннан кейін шешілетін болады", - деді полиция.

• "Тегін ештеңе болмайды": Ақтөбе облысына келген ресейліктерді уақытша жазғы лагерьлерге орналастырады

• "От жағып жылынып, лашықтарды паналауда": Қазақстан мен Ресей шекарасында жолаушылар бесінші күн кезек күтуде​​​​​​​