Hyundai Қазақстанда ЖИ-ға негізделген қала технологияларын сынамақ

Hyundai Motor Group Қазақстанды жасанды интеллектке негізделген жаңа қалалық технологияларды сынайтын алаңдардың бірі ретінде қарастырып отыр. Компания бұл бағыттағы жобаларын Alatau City-де жүзеге асыру мүмкіндігін зерттемек. Бұл туралы Stan.kz ақпарат агенттігі хабарлайды.

Korea Bizwire мәліметінше, 16 қыркүйекте өткен “Корея – Орталық Азия” алғашқы бизнес-саммиті аясында Hyundai Motor Group, Caspian Group және United Group Alatau ынтымақтастық туралы келісімге қол қойған.

Тараптар Alatau City аумағында көлік, энергетика және цифрлық технологияларды тоғыстыратын жаңа шешімдерді енгізу мүмкіндігін қарастырмақ.

Hyundai ерекше мән беріп отырған бағыттардың бірі – Physical AI, яғни жасанды интеллектіні нақты өмірдегі жүйелермен ұштастыру. Мұндай технологиялар көлік қозғалысын басқарудан бастап, энергетика, роботтандыру және қала инфрақұрылымына дейін қолданылуы мүмкін.

Оқыңыз

Hyundai – 2026 жылғы шілде айындағы Қазақстан автокөлік нарығының көшбасшысы Оқыңыз

Жобаның алғашқы кезеңінде Алматы мен Alatau City-ді жалғайтын Gate District аумағын дамыту мүмкіндігі зерттеледі. Бұл жерде қаланы басқарудың жаңа үлгілері мен заманауи технологияларды сынақтан өткізу көзделіп отыр.

Alatau City Алматының солтүстігінде орналасқан. Жаңа қаланың аумағы шамамен 880 шаршы шақырымды қамтиды.

Алайда Hyundai әзірге нақты қандай нысандар салынатынын немесе жобаға қанша қаражат құятынын жариялаған жоқ. Алдымен жобалардың техникалық және экономикалық тиімділігі сараланып, содан кейін компанияның қатысу форматы анықталмақ.

Осылайша, Hyundai Alatau City-ді жай ғана жаңа қала емес, ақылды көлік, энергия және жасанды интеллект технологияларын бір ортада сынауға мүмкіндік беретін болашақ қаланың тәжірибе алаңы ретінде қарастырып отыр.

Еске салайық, бұған дейін Президент Қасым-Жомарт Тоқаев Қазақстан мен Корея арасындағы экономикалық байланысты кеңейтіп, кореялық компанияларды елдегі жаңа өндіріс, құрылыс, энергетика, логистика және жасанды интеллект жобаларына инвестиция салуға шақырғаны хабарланды. Мемлекет басшысы бұл туралы қазақ-корей дөңгелек үстелінде айтқан еді.