Қазақстандық зілтемірші Арли Чонтей Ташкентте әлем чемпионы атанды

Қазақстандық зілтемірші Арли Чонтей Ташкентте өтіп жатқан әлем чемпионатында 55 келіге дейінгі салмақ дәрежесінде алтын медальді жеңіп алды, деп хабарлайды Stan.kz ақпараттық агенттігі Vesti.kz-ке сілтеме жасап.

29 жастағы спортшы үш мүмкіндікте де жұлқа көтерді. Оның бірінде 118 келі нәтиже көрсетті. 

Серпе көтеру жаттығуы бойынша да таза өнер көрсетті. Максималды көрсеткіш 142 келіге жетті. Жалпы 260 келі көрсеткішпен отандасымыз жеңіске жетті. 

Екінші орын Таиландтан келген Тада Сомбунуанға бұйырды. Ол 256 (115+141) ұпай жинады. Ал үздік үштікке болгариялық Ангел Русев кірді. Ол 254 келі (110+144) нәтиже көрсетті. 

• "Баланың сабақ үлгерімі жақсарады, ақыл-ойы дамиды": Қазақстандық бапкер тоғызқұмалақтың пайдасы жайлы айтты

• "Тәтті шай болып қойды": Сәкен Бибосынов 1 айдың ішінде үйленетінін айтты

Айта кетейік, ауыр атлетикадан әлем чемпионаты кеше, 7 желтоқсан күні Ташкентте басталды. Қазақстан атынан біріншілікте 5 спортшы өнер көрсетеді: Арли Чонтей, Нұрғиса Әділетұлы мен Артем Антропов (екеуі де 96 келіге дейін), Карина Құзғанбаева (81 келіге дейін) және Айзада Муптильда (87 келіден жоғары).