Испанияда баспана тапшылығы мен қымбатшылыққа қарсы ондаған мың адам көшеге шықты
Испанияда жалдау ақысының өсуі мен қолжетімді баспананың тапшылығы тұрғындардың наразылығын тудырды. 11 қарашада елдің бірнеше қаласында ондаған мың адам шеруге шықты. Мадридте 120 мың адам қатысқан акциядан кейін Барселонада тәртіпсіздік болып, полиция кемінде 52 адамды ұстады. Бұл туралы Stan.kz ақпарат агенттігі dw.com порталына сілтеме жасап хабарлайды.
Испанияда жалпыұлттық ереуіл 11 қараша, сәрсенбі күні жаппай наразылық акцияларымен аяқталды. Тұрғындар өмір сүру құнының өсуіне және қолжетімді баспананың жетіспеуіне қарсылық білдірді. Мадрид билігінің мәліметінше, қаладағы шеруге 120 мың адам қатысқан. Ал наразылықты ұйымдастырған жалға алушылар бірлестіктері қатысушылар санын 600 мың деп бағалады. Барселонада полицияның есебінше, көшеге 55 мың адам шыққан.
Агенттіктің хабарлауынша, бұл Испанияда соңғы 14 жылда алғаш рет өткен бір күндік жалпыұлттық ереуіл. Акция елдегі парламент сайлауына екі жарым апта қалғанда ұйымдастырылды. 11 қараша кешінде Испанияның басым бөлігінде наразылық акциялары бейбіт өткен. Алайда Барселонада шеру аяқталғаннан кейін тәртіпсіздік басталған.
RTVE телеарнасының мәліметінше, беттерін жасырған оңшыл экстремистер тобы бірнеше дүкеннің витриналарын сындырып, қоқыс контейнерлерін өртеген. Олар полиция қызметкерлеріне бөтелке, тас және петарда лақтырған. Полиция шабуыл жасағандарға қарсы резеңке таяқ қолданған.
Жалпыұлттық ереуіл Испанияның қоғамдық және экономикалық өмірін ішінара тоқтатқан. Елдің солшыл үкіметі наразылық білдірушілерді қолдаса, оңшыл оппозиция шерулерді идеологиялық сипаттағы акция деп атаған. Испанияның CCOO кәсіподақтар бірлестігі жалпыұлттық ереуілді "толық табыс" деп бағалап, оның ұйымдастырушылар күткен нәтижеден асып түскенін мәлімдеді.
"Электр энергиясын тұтыну жұмыс күнінен гөрі жексенбіге тән деңгейге дейін төмендеді. Испаниядағы өнеркәсіп пен экономиканың стратегиялық салалары тоқтады", – деп жазды кәсіподақ X әлеуметтік желісінде.
Ал жұмыс берушілердің CEOE бірлестігі ереуілге қатысу деңгейі өте төмен болғанын, қызметкерлердің 10 пайызынан азы жұмысқа шықпағанын мәлімдеді.
DPA мәліметінше, ереуіл Volkswagen концернінің Памплонадағы зауыты мен оның еншілес компаниясы Seat-тің Марторельдегі өндірісіне, сондай-ақ көтерме сауда базарлары мен Альхесирас портына әсер еткен. RTVE хабарлауынша, ел бойынша өткен наразылық акциялары кезінде полиция кемінде 52 адамды ұстаған. Испаниядағы жаппай наразылыққа Мадридте 87 жастағы зейнеткер Марикармен Абаскальдың пәтерінен шығарылуы себеп болған.
Әйел Испания астанасындағы пәтерде 70 жыл тұрған. Ол ұзақ уақыт бойы ай сайын 500 еуро жалдау ақысын төлеген. Алайда 2018 жылы пәтер жаңа компанияның меншігіне өткеннен кейін жалдау ақысы көтерілген. Жаңа баға зейнеткердің ай сайынғы зейнетақысынан да асып кеткен. 23 қыркүйекте Марикармен Абаскаль пәтерінен шығарылған. Арада бірнеше күн өткен соң ол ауруханада қайтыс болған. 5 қазанда Испанияның социалистік премьер-министрі Педро Санчес парламентті таратып, 2026 жылғы 29 қарашада мерзімінен бұрын сайлау өтетінін жариялаған.
Ол мұндай шешімге парламенттің үкімет ұсынған тұрғын үй нарығын реформалау жобасын қабылдамауынан кейін барғанын айтқан. DPA агенттігінің жазуынша, соңғы жылдары Испанияда қолжетімді баспана тапшылығы күрделене түскен. Жалға алу ақысы мен тұрғын үй бағасы азаматтардың нақты табысынан жылдам өскен. Соның салдарынан көптеген тұрғын 30 жастан асса да, жеке пәтер жалдауға мүмкіндігі болмай, ата-анасымен бірге тұруға мәжбүр.
Агенттік тұрғын үй бағасының өсуіне елге келетін мигранттар санының артуы мен қолжетімді баспана құрылысының жеткіліксіздігі де әсер етіп отырғанын атап өткен. Испанияның Орталық банкінің бағалауынша, қазір елде шамамен 750 мың тұрғын үй жетіспейді. Болжам бойынша, 2028 жылға қарай баспана тапшылығы бір миллионнан асады.
Еске салайық, бұған дейін Францияда қымбатшылық, жанармай бағасының өсуі, әлеуметтік шығындардың қысқаруы мен саяси дағдарысқа наразы жүздеген мың адам көшеге шықты. Бастапқыда мектептердегі мұғалім тапшылығына байланысты басталған шерулер біртіндеп жалпыұлттық қозғалысқа ұласты. Наразылық кезінде тәртіпсіздіктер болып, мыңдаған адам ұсталды. Stan.kz Франциядағы халық наразылығының неден басталғанын және билік оған қалай жауап бергенін анықтады.
Астаналық тұрғын ұлының Қазақстанда жоқ диагнозына ем таппай жүр
