Ең жақын досы туған ағасы болып шықты: Әйел екі жыл бойы араласқан адамы туралы күтпеген шындықты білді
Манчестер әуежайында танысып, екі жыл бойы ең жақын дос болған әйел мен ер адам күтпеген шындықты біледі. Олар кездейсоқ туған аға мен қарындас болып шығып, арада ондаған жыл өткен соң анасымен қайта қауышқан. Бұл туралы Stan.kz ақпарат агенттігі ВВС порталына сілтеме жасап хабарлайды.
Дэйв Грин мен Андреа Эрмстон екеуі де Манчестер әуежайында жұмыс істеген. Дэйв әуежайдағы автобус станциясын басқарса, Андреа сауда автоматтарына қызмет көрсетумен айналысқан. 2005 жылы танысқаннан кейін олар күтпеген жерден тез тіл табысып, жақын досқа айналады. Бір-бірін жарты сөзден түсінетін. Алайда олардың арасындағы ерекше жақындықтың себебі кейін ғана белгілі болды.
“Жылдар бойы анасының үйі мен қарындасының мектебі жақтан өтіп жүрген”
Бір күні телефон арқылы сөйлесіп отырған кезде Дэйв бала кезінде асырап алынғанын және туған кездегі есімі Стюарт Праудлав болғанын айтып қалады.
"Сол сәтте қатып қалғандай болдым. Бір минуттай үнсіз отырдым", – деп еске алады Андреа.
Себебі оның қыз кезіндегі тегі де Праудлав болатын. Ол өзінен үлкен ағасының дүниеге келісімен басқа отбасыға асырап берілгенін бұрыннан білетін.
"Бұл өте сирек кездесетін фамилия. Бізден басқа ешкімнен естімеппін. Сол сәтте оның дәл өзі екенін түсіндім", – дейді ол.
Андреа бірден анасы Сьюзенге телефон шалып, ағасының туған күнін сұрайды. Барлығы сәйкес келеді: 1966 жылдың 24 наурызы. Ол дереу Дэйвке қайта қоңырау шалады.
"Мен оған: "Бұл сенсің! Шынымен сенсің! Сені қазір көруім керек” дедім де, артынан барып алып кеттім. Қатты дірілдеп тұрдым. Жүрегім кеудеме сыймай соқты. Ақыры оны таптым. Бұл – адам сенгісіз сезім еді", – деп қосты Андреа.
Кездескеннен кейін екеуі аналары Сьюзеннің үйіне барады. Жолда Дэйв бұл бағыттың өзіне жақсы таныс екенін байқайды. Автобус станциясының басшысы болғанға дейін дәл осы бағытта автобус жүргізген екен. Сөйтсе, өзі байқамай жылдар бойы туған анасының үйі мен қарындасы оқыған мектептің жанынан күн сайын өтіп жүрген.
“Ұлын бала сүйе алмаған жақсы әйел асырап алған”
Анасы Сьюзен үшін бұл кездесу мүмкін емес ертегідей әсер қалдырған. Сьюзен қызына оның ағасы бар екенін бала кезінен айтып жүрген. Ұлын бала сүйе алмаған жақсы әйел асырап алғанын да жасырмаған.
"Көз жасымызды тыя алмадық. Кейін бәріміз құшақтастық. Анам мен ағамның қайта қауышқанына сене алмадым. Бұл өмірімдегі ең әсерлі сәттердің бірі болды. Сол кезде-ақ оған барып, бірге ойнағым келді. "Оны үйге алып келе алмаймыз ба?" деп сұрадым. Анам бәрі оңай емес екенін түсіндірді. Сонда мен: "Бір күні міндетті түрде оны тауып беремін", деп уәде бергенмін. Анам өмір бойы осы күнді күтті. Сондықтан оған берген уәдемді орындадым деп есептеймін", – деді Андреа.
Сьюзен ұлын табу үшін бірнеше рет әрекет жасап, тіпті Құтқару армиясының көмегіне де жүгінген. Бірақ нәтиже шықпаған. Ақыры араға ондаған жыл салып, анасы мен ұлы қауышты. Сьюзеннің үйіндегі каминнің үстінде Дэйвтің сәби кезіндегі суреті тұрған. Бұл фотосуретті асырап алған ата-анасы бала жаңа отбасына барғаннан кейін бірнеше күн өткен соң жіберген екен. Дәл сондай сурет Дэйвтің асырап алған ата-анасының үйінде де сақталған.
ОқыңызДэйв өзінің асырап алынғанын 10 жасында білген. Ата-анасы оған барлық құжатты көрсеткен.
"Мен өте бақытты балалық шақ өткіздім. Сондықтан туған анамды іздеу керек деп ешқашан ойлаған емеспін. Ішімде жауапсыз қалған сұрақтар болған жоқ. Сол кезде өмірімде қуаныш аз еді. Ал кейін ең жақын досымның туған қарындасым екенін білдім. Биологиялық анамды таптым. Оны бақытты ете алдым. Бұрын бар екенін де білмеген отбасымды кездестірдім", – деді Дэйв.
Жақында Сьюзен өмірден өтті. Бірақ Дэйв пен Андреа аналары ұлымен қайта қауышып үлгергеніне шүкіршілік етеді.
"Анам сені өмір бойы іздеді. Тек сенің жақсы өмір сүріп жатқаныңа көз жеткізгісі келді. Ата-анам ерте ажырасып кетті. Бір жерде ағамның бар екенін біліп өстім, бірақ қайда екеніңді білмедік", – деді Андреа ағасына.
Қазір ағалы-қарындас Стаффордшир графтығындағы Кидсгроув қалашығында тұрады. Олар бірге өткізген әрбір сәтті бағалайды. Екеуі де бастарынан өткен бұл оқиғаны: "Бұл – лотерея ұтқанмен бірдей болды" деп сипаттайды.
