Алматыда компания "Халал" сертификаттарын заңсыз беріп келген

Алматыда қажетті рұқсат қағаздарынсыз халал-сертификаттарын берген компанияға айыппұл салынды. Бұл туралы Stan.kz ақпарат агенттігі хабарлайды. 

Алматы қаласындағы әкімшілік құқық бұзушылықтар жөніндегі мамандандырылған ауданаралық соты "HALAL-HOLDINQ" ЖШС-ін әкімшілік жауапкершілікке тартты.

Сот мәліметіне сәйкес, компания тиісті рұқсат құжаттарынсыз қызмет жүргізгені үшін кінәлі деп танылған. Атап айтқанда, компания өнімдер мен қызметтердің "халал" стандарттарына, соның ішінде OIC/SMIIC халықаралық стандарттарына сәйкестігін растау қызметін заңсыз жүзеге асырған.

Іс материалдарына сәйкес, компания кәсіпкерлік субъектілеріне "халал" сертификаттарын берген.

Сот қаулысында берілген сертификаттардың қатарында "Серғазина Г. Б." жеке кәсіпкерлігіне (ЖК), "Трал Гарант" ЖШС-іне, "Jimon Altun Nur Daily Necessities" ЖШС-іне және "Махамбетов Е. М." ЖК-не берілген құжаттар бар екені атап өтілген.

Оқыңыз

“Хрю-хрю” мен “гав-гав” жегіңіз келмесе”: “Халал Даму" компаниясының жазбасы дау тудырды Оқыңыз

Соттың мәліметінше, аталған құжаттар кәсіпкерлер тарапынан коммерциялық қызметте өнімдердің, қызметтердің немесе өндірістік үдерістердің "халал" стандарттарына сәйкес келетінін растау үшін пайдаланылған. Яғни, бұл құжаттар жай ғана кеңес беру немесе ұсыным сипатындағы қағаздар емес, тұтынушылардың таңдауына, серіктестердің сеніміне және бизнестің іскерлік беделіне тікелей әсер етуі мүмкін сертификаттар болған.

Негізгі мәселе аккредитацияға келіп тірелді. Аккредитация субъектілерінің тізіліміндегі мәліметтерге сәйкес, "HALAL-HOLDINQ" ЖШС-інде ұлттық аккредиттеу жүйесі бойынша қолданыстағы аккредитация аттестаты болмаған және ол аккредитация субъектісі ретінде тіркелмеген.

Компания директоры Алмагүл Әбілдинова сот отырысында іс материалдарында көрсетілген деректерді растады және құқық бұзушылықты мойындады. Нәтижесінде "HALAL-HOLDINQ" ЖШС-іне 25 АЕК (108 125 теңге) көлемінде айыппұл салынды.

Еске салсақ, бұған дейін мыңдаған кәсіпкер заңды күші жоқ "Халал" сертификаттарымен жұмыс істеп келгені туралы жазған едік.