"Әкең гүл шығаратын зауыт па?": Қойшы бала қыздарға қалай қырындайтынын айтып, елді күлдірді
Қойшы бала атанып кеткен Айдос Кәденұлы ауылдағы мектебінен шығып, Алматыдағы №180 білім ордасына ауысқан. Жігер Ауыпбаевпен бірге жұмыс істеп бастағандықтан, қалада оқыған оңтайлы, дейді өзі. Айдос Қызық Live бағдарламасына сұхбат беріп, мектептегі махаббаттары жайлы баяндады.
9-сыныпта оқитын Айдос "жүрегімнің иесі әлі табылмай жатыр" деп жұртты күлкіге қарық қылды. Айтуынша, ауылда оқып жүргенде оған қарамай қойған қыздар көп болған.
"Көбі ауылдағы сыныптастарым болған. Кішкентай кезімізде Аружан деген қызға ғашық болдым. Староста болған. Оның бәрі тауық махаббат қой.
"Мама-папа қызың бар ма?" десе, иә, жүреміз деп өтірік айтатынмын. Ұлдардың арасында да тартыс болатын.
Аружан білмейді оны. Кім жеңіледі, сол барып "сені анау жақсы көреді" деп айтады ғой. Негізі қатты төбелесіп кетпейміз. Ауызбен ғана.
Бәстесіп, Аружанның өзінен сұраймыз. Бәрімізді жақсы көрмейтінін білген соң, басқа қызға барамыз", – деп еске алды Айдос 1-сыныптағы махаббатын.
Айдос сезімін білдіріп, сөз салған қыздардың ішінде жылап, хатты жыртып тастаған қыздар да болған. Ондайда мектепке баруға ұяласың, дейді Қойшы бала.
"Сәлем! Қалайсың?" деп бастап қыздың көңілін аударуға тырысасың. "Сенің әкең гүл шығаратын зауыт емес па?" дейсің. "Жоқ" десе, "Ендеше, сендей гүлді қайдан тапқан?" дейсің. "Аспандағы жұлдыздар ма көзімнің жанарын алып тұрған десем, сен екенсің ғой" дейсің. Хат жазып, жүректің суретін саласың. Love is деген сағыздан жүрек салып барасың, жыртып тастайды ғой.
Жайна деген қыз болды, 4-сыныпта кетіп қалды. Практикант апай келіп: “Жайна – менің сіңлім, оны кім жақсы көреді?" дегенде барлық ұл тақтаға шығып тұрдық. Ол қыз ұялып, 2-3 күн сабаққа келмей қойған.
Сыныптағы үшінші махаббатым Жансая деген қыз болған. Бойы ұзын, әдемі қыз болатын. 6-сыныпта, қыста ғой. Қыздарды қарға лақтырып ойнаймыз. Қар атысып жүрген кезде Жансаяға ғана тиісе беретінмін. Бір күні WhatsApp-тан: "Сен неге маған ғана тиісе бересің?" деп жазды. "Әдемі болғандықтан шығар" дедім. Кішкентай шоколад бересің, одан үлкенірек, соңына қарай үлкен Merci сияқтысын бересің.
Ең соңында "қызым боласың ба?" десең, "жоқ" дейді. Үйге барып түңілесің, қайран 5000 теңгем-ай дейсің… Оның үстіне, қасымда отыратын қыз еді. Қыста туған күніне 10 мың теңгеге алқа, сақина алып бергенмін. Ол да бар. Одан кейін махаббат дегенді тоқтаттым", – деп ағынан жарылды Айдос.
Бір қызығы, кезінде Айдосқа қарамай қойған қыздар ол танымал болғаннан кейін өзгеріп шыға келген. Тіпті қайта хат жазған арулар да табылыпты.
"Баяғыда араласпайтын қыздар жаза бастады. "Кезінде артымнан жүгіріп едің" ғой деген қыздар болды", – дейді Айдос.