"Қабырғадағы жарықшақтардан келесі кабинет көрінеді": Сайрамдағы 375 миллионға салынған мектептің жағдайы мүшкіл
Түркістан облысында бес бала “қауіпті” деп танылған мектепте оқуға мәжбүр. 13 жыл бұрын салынған мектептің жағдайы қайта жөндеуді қажет етеді, деп хабарлайды Stan.kz ақпарат агенттігі “Хабар 24” арнасына сілтеме жасап.
Cурет: “Хабар 24” түсірілімінен скриншот
Сайрам ауданының №49 мектеп ғимаратында қабырғалар жарылған. Мұғалімдердің айтуынша, жарықшақтардың көлемі ірі болғаны сонша, көрші кабинеттерді көруге болады.
Мектептің басым бөлігі "қауіпті аймақ" деп танылған. Мұғалімдер мен оқушылар ол жерлерді айналып өтуі тиіс. Мектеп қабырғаларында апта сайын жаңа олқылықтар пайда болады.
“2022 жылы сәуірде сараптама комиссиясы мектептің көп бөлігін қауіпті деп атады. Күрделі жөндеу қажет. Білім бөлімі жобалық-сметалық құжаттаманы 4 миллион 800 мың теңгеге жасады, бірақ жөндеу жұмыстарына 675 миллион теңге керек болып шықты. Мектеп 375 миллион теңгеге салынды, ал жөндеу жұмыстарына екі есе көп қаржы керек”, – дейді мектеп директоры Мадина Көшекбай.
Сонымен қатар, мектеп қызметкерлерін жылу мәселесі де алаңдатады. Ұжым қыста жұмыс істеп, білім алу мүмкін емес екенін жеткізді.
“675 миллион теңгеге сметалық құжаттама әзірленгенімен, әлі күнге дейін қаржы бөлінбеді. Келесі жылы бұл соманы “Ауыл – ел бесігі” жобасы аясында бөлу жоспарлануда”, – деп мәлімдеді аудандық адам әлеуетін дамыту бөлімінің бас бухгалтері Нұрлан Бақтыбаев.
13 жыл бұрын мектеп “100 мектеп, 100 аурухана” мемлекеттік бағдарламамен салынды. Тендерді жеңген компания Сайрам ауданындағы басқа да мектептердің құрылысымен айналысқан. Бірақ шенеуніктердің айтуынша, тек осы мектепте ғана осындай мәселе туындап отыр.
Естеріңізге салсақ, осыған дейін Шардара қаласында бес жыл бұрын салынған мектептің құлағалы тұрғаны жарияланған еді.