Қазақстанда енді бастауыш сынып оқушылары 1 қыркүйектен бастап жаңа тәсілмен бағаланады
2026 жылғы 1 қыркүйектен бастап Қазақстан мектептерінде 2-4-сынып оқушыларын бағалаудың жаңа тәсілі енгізіледі. Оқу-ағарту министрлігі ата-аналар мен педагогтердің ұсыныстарын ескеріп, формативтік бағалаудың рөлін күшейтпек. Бұл туралы Stan.kz ақпарат агенттігі хабарлайды.
Оқу-ағарту министрлігі бастауыш сыныптардағы бағалау тәсілін қайта қарады. Оған ата-аналардың өтініштері, педагогтердің ұсыныстары мен практикалық тәжірибесі, білім алушылардың оқу жетістіктерін мониторингтеу нәтижелері, сондай-ақ отандық және халықаралық зерттеулердің қорытындылары негіз болды.
Оқу-ағарту бірінші вице-министрі Шынар Ақпарованың айтуынша, критериалды бағалау жүйесі сақталады. Осыған сәйкес, 2026 жылғы 1 қыркүйектен бастап 2-4-сыныптарда бағалаудың жаңартылған тәсілдері енгізіледі.
"Бірінші сыныпта баға қойылмайды. Жаңартылған тәртіпте формативтік бағалау сақталып, оның рөлі күшейтіледі. Ал оқу бөлімдерін меңгеру нәтижесін анықтау үшін аралық бағалау енгізіледі. Ең алдымен формативтік бағалаудың тоқсандық бағадағы үлесі артады. Формативтік бағалау бұрынғыдай 1-ден 10 балға дейінгі шкала бойынша жүргізіледі. Тек балл қою тәсілі нақтыланады", – деді спикер баспасөз конференциясында.
Еске салайық, бұған дейін Қазақстанда педагог мәртебесі артып, білім беру жүйесіне IT мен жасанды интеллект енгізіліп жатқаны туралы жазған едік. 1-4-сыныптардағы "Цифрлық сауаттылық" пәнінің атауы "Цифрлық сауаттылық және жасанды интеллект", ал 5-11-сыныптардағы "Информатика" пәнінің атауы "Информатика және жасанды интеллект" болып өзгертілді.
