Қаржы пирамидасын ұйымдастырғандар 5 күнде 50% табыс табуға болады деп сендіріп, 700 миллион теңгені қолды еткен

Тергеу мәліметінше, күдікті әлеуметтік желілер арқылы азаматтардан 20 мыңнан 500 мың теңгеге дейін ақша тартып, 3-5 күн ішінде салынған қаржының 30-50%-ына дейін табыс түседі деп уәде еткен. Жаңа қатысушыларды тарту үшін “жылдам пайда” және уақыты шектеулі ұсыныстар сияқты психологиялық тәсілдер қолданылып, азаматтарды қаржылық тәуекелдерді толық бағаламай шешім қабылдауға итермелеген.

“Уәде етілген табыс кепілдіктері тек ауызша айтылған және ешқандай нақты кәсіпкерлік қызметпен немесе келісімшарттық міндеттемелермен расталмаған. Шын мәнінде, салымшыларға төлемдер жаңа қатысушылардан түскен қаражат есебінен жүргізілген. Салдарынан қаржы пирамидасына 900-ден астам салымшы тартылып, жалпы салынған қаражат көлемі 700 миллион теңгеден асқан”, – деп мәлімдеді агенттік.

Тергеу жұмыстары жалғасып жатыр.

Қаржылық мониторинг агенттігі азаматтарды сақ болуға және қысқа мерзімде жоғары табыс уәде ететін күмәнді жобаларға ақша салмауға шақырды. Инвестиция жасамас бұрын ұйымның қызметінің заңдылығын және тиісті рұқсат құжаттарының бар-жоғын мұқият тексеру қажет екенін ескертті.