"Ирина Кайратовна" тобындағы мобилографтың өліміне қатысты сотқа дейінгі тергеу басталды

"Ирина Кайратовна" тобының мобилографы Шахназ Жылқайдаровтың өліміне қатысты сотқа дейінгі тергеу басталды. Бұл туралы Stan.kz ақпарат агенттігі хабарлайды, Астана қаласы Полиция департаментінің баспасөз қызметіне сілтеме жасап.

Жас жігіттің өліміне қатысты соталды тергеу амалдары жүргізіліп жатыр.

"Мобилографтың өліміне қатысты қылмыстық іс қозғалды. Бүгінгі таңда қажетті тергеу әрекеттері өтіп жатыр, сараптамалар әлі дайын емес. Аталған дерек бойынша "адам өлімі" бабымен сотқа дейінгі тергеу жүргізілуде", – делінген хабарламада.

Сондай-ақ елорда полициясы сотқа дейінгі тергеу ісіне қатысты және өзге де деректер Қылмыстық іс жүргізу кодексінің 201-бабына сәйкес жариялауға рұқсат етілмегенін айтты.

Қазан айының басында Астанада "Ирина Кайратовна" тобының концерті кезінде топтың мобилографы Шахназ Жылқайдаров сахнада құлап, қайтыс болған еді.  

Айта кетейік, Астана қаласының денсаулық сақтау басқармасы 21 жастағы жігіттің өліміне қатысты пікір білдіріп, неден көз жұмғаны жайлы болжам жасаған болатын. 

Еске салсақ, марқұмның құрбысы Мөлдір есімді бойжеткен Шахназ Жылқайдардың өліміне энергетикалық сусындардың қатысы жоғын және марқұмның апта бойы жұмыстан бас көтермей, екі тәулік бойы көз ілмегенін айтқан болатын.

Аталған топтың концерті кейінге шегеріліп, концерт өтпей қалған еді.