Министрлік Каспий құбыр консорциумы жұмысының тоқтауы туралы ақпаратқа жауап берді

Қазақстанның энергетика министрлігі Каспий құбыр консорциумы (КТК) жұмысы толық тоқтайды деген ақпаратты жоққа шығарды. Бұл туралы Stan.kz ақпарат агенттігі хабарлайды.

Энергетика министрінің кеңесшісі, министрліктің ресми өкілі Әсел Серікбаеваның мәліметінше, КТК-ның толық тоқтауы сценарийі қарастырылып жатқан жоқ.

"31 шілдеде Каспий құбыр консорциумы (КТК) мұнай құбырының жұмысы уақытша тоқтатылды. Соған қарамастан жүк жөнелтушілерден мұнай қабылдау және резервуарлар паркін толтыру жалғасып жатыр. 1 тамыздан бастап тәулігіне 100 мың тонна мұнай қабылданып жатыр. Тасымалдау көлемін одан әрі ұлғайту теңіз терминалында танкерлердің тиеуге уақытылы қойылуына байланысты болады", – деді Әсел Серікбаева.

Ведомствоның пікірінше, 31 шілдеде КТК мұнай құбырының жұмысы уақытша тоқтатылғанымен, мұнай жөнелтушілерден шикізат қабылдау және резервуарларды толтыру жалғасып жатыр.

Оқыңыз

Қазақстан Каспий теңізінің түбімен интернет кабелін тарту жұмыстарын бастады Оқыңыз

1 тамыздағы жағдай бойынша тәулігіне 100 мың тонна мұнай қабылданған. Ал тасымалдау көлемін одан әрі арттыру теңіз терминалында танкерлердің уақытылы тиеуге қойылуына байланысты болады.

Министрлік қазіргі жағдайды тұрақты бақылауда ұстап отырғанын, КТК және жүк жөнелтушілермен үздіксіз байланыста жұмыс істеп жатқанын хабарлады.

Каспий құбыр консорциумы – Қазақстан, Ресей, АҚШ және Батыс Еуропаның бірқатар елдерінің ірі мұнай-газ компанияларын біріктіретін халықаралық жоба. КТК арқылы Теңіз, Қашаған және Қарашығанақ кен орындарының мұнайы экспортқа шығарылады.

Себебі бұл Қазақстан мұнайының негізгі экспорттық бағыты. Жыл сайын құбыр арқылы кемінде 60 миллион тонна мұнай, яғни елдің жалпы мұнай экспортының шамамен 80 пайызы тасымалданады.

Еске салайық, 30 шілдеде КТК теңіз терминалы маңында екі танкерге дрондар шабуыл жасап, соның салдарынан бір кемеде өрт шыққан.

Қазақстанның сыртқы істер министрлігі шабуылдарды елдің экономикалық мүдделеріне қарсы жасалған жол беруге болмайтын әрекет деп бағалап, қазақстандық мұнай экспортталатын кемелер мен инфрақұрылымға жасалған шабуылдарды дереу тоқтатуды талап етті.

Сондай-ақ ведомство келтірілген шығынды бағалап жатқанын және халықаралық құқық аясында өз мүдделерін қорғау, оның ішінде өтемақы талап ету құқығын сақтап қалатынын мәлімдеді.

Бұдан бөлек, 23 шілдеде КТК теңіз терминалындағы тиеу жұмыстары уақытша тоқтатылып, соның салдарынан мұнай өндіру көлемі төмендеген болатын. Ал 27 шілдеде КТК мұнай қабылдауды қайта бастағаны хабарланған еді.