Головкин, Елеусінов, Әлімханұлы рингке шығады: Қазақстандық бокс жанкүйерлерін алда қандай жекпе-жектер күтіп тұр

Чемпиондық атаққа талас және әлемдік рейтингтегі қарсыласқа қарсы жекпе-жек. Кәсіпқой бокстағы отандастарымызды алда маңызды сынақтар күтіп тұр. Бұл тек боксшылардың ғана емес, жанкүйерлер де асыға күтетін оқиға. Stan.kz ақпарат агенттігі жыл соңына дейін болатын бокс жекпе-жектерін назарыңызға ұсынады.

Жан Кособуцкий және Алексис Гарсией

20 қарашада ауыр салмақ боксшысы Жан Кособуцкий доминикандық Алексис Гарсиейге қарсы жекпе-жек өткізеді. Гамбургте болатын бокс кешінде боксшылар WBC International Silver чемпиондық белбеуін таласқа салады. Кособуцкийдің 31 жастағы қарсыласы 11 жекпе-жек өткізіп, оның 7 нокаутпен жеңген. 

"Дайындық Қостанайда өтіп жатыр. Жақында жаттығуларды аяқтау үшін Гамбургке аттанамыз. Жаңа қалаға бейімделу керек. Қарсыласымды жақсы деуге болады. Жекпе-жек статистикасы да жаман емес. Қалғаны техниканың еншісінде. Қарап, зерттейміз және жұмыс істейміз", - деп пікір білдірді Жан Кособуцкий vesti.kz сайтына берген сұхбатында. 

Бұл Кособуцкийдің 2021 жылы өткізетін үшінші кездесуі болмақ. Ақпан айында боксшы WBA International белбеуін жеңіп алған болатын. 

Жәнібек Әлімханұлы және Хассан Н’Дам Н’Жикам

Жәнібек Әлімханұлы да (10-0, 6 КО)  20 қарашада жекпе-жек өткізеді. Сарапшылардың ойынша бұрынғы әлем чемпионы Хассан Н’Дам Н’Жикамға (38-5-0, 21 КО) қарсы кездесу Әлімханұлы үшін үлкен мүмкіндік болмақ. Егер бұл жекпе-жекті жеңсе, бұдан да белгілі боксшылармен жұдырықтасуы мүмкін. 

Әлімханұлы соңғы кездесуде Роб Брандты жеңген еді. Ал қарсыласы соңғы жекпе-жегінде венгерлік Габор Горбичтен басым түскен. 

"Салмақ тамаша. Жылдамдық пен күш те өз деңгейінде. Бұйыртса 20 қараша рингке шығуды асыға күтіп жүрміз", - деп жазды Жәнібек өз Instagram парақшасында. 

Садриддин Ахмедов және Жохан Гонзалес

23 жастағы Садриддин Ахмедов (12-0, 10 КО) желтоқсанда венесуэлалық Жохан Гонзалеспен (28-1, 28 КО) жұдырықтасуы мүмкін. Бұл – Ахмедовтың қаңтар айынан кейінгі алғашқы кездесуі. Арқасын жарақаттап алған боксшы спорттан шеттетілген болатын. 

Қарсыласы Жохан Гонзалес WBA рейтингінің топ-15 тізіміне енген. Ол кәсіби бокстағы мансабында 28 кездесу өткізіп, барлығын нокаутпен жеңген. Алайда жекпе-жектері Венесуэла және Панама елдерінде ғана ұйымдастырылған. 

Сарапшылардың айтуынша бұл кездесу Ахмедовке рейтингте көтерілуге үлкен көмегін тигізеді.

Данияр Елеусінов және чемпиондық атақ

Рио Олимпиадасының чемпионы Данияр Елеусінов 18 желтоқсанда Нұр-Сұлтан қаласында жекпе-жек өткізеді. Алайда боксшының қарсыласы әлі анықталмады. Кездесу бокс кешінің басты жекпе-жегі болмақ және IBO мен IBF-Continental белбеулері сарапқа салынады. 

Бұрын хабарланғандай, Елеусіновпен қатар Иван Дычко да (10-0, 10 КО) осы бокс кешінде жұдырықтасады. 
 

Геннадий Головкин және Риота Мурата

Орта салмақта IBF және IBO нұсқалары бойынша чемпион Геннадий Головкин 28 желтоқсан күні Жапонияда жекпе-жек өткізеді. Оның қарсыласы WBA Super белбеуінің иегері Риота Мурата (16-2, 13 КО) болмақ. 

Риота Мурата соңғы жекпе-жегін 2019 жылы 23 желтоқсанда өткізген. Бұл кездесуде қарсыласы Стивен Батлерді техникалық нокаутпен жеңген болатын. 

Головкин 2020 жылы өткен соңғы кездесуінде Камиль Шереметаны жеңген. Оның қарсыласы жекпе-жекті жалғастырудан бас тартқан еді. 

Айта кетсек, Нұр-Сұлтан қаласында өтетін бокс кешінде Дәурен Елеусінов те кәсіпқой бокстағы екінші жекпе-жегін өткізеді. Боксшының қарсыласы – әзірбайжандық Али Мамедов. 

Сонымен қатар, 20 қарашада "Панда" лақапатымен белгілі ауыр салмақ боксшысы Серік Мұсаділов америкалық Дастин Лонгпен жұдырықтасады. Жекпе-жек Майамиде өтеді. Қазақстандық боксшы кәсіпқой рингке он кездесу өткізіп, тоғызын нокаутпен жеңген. Жекпе-жек 8 раундқа жоспарланған.