Алматыда некрофилияға күдікті азаматтың ұсталғаны осы жылдың сәуір айының соңында белгілі болды. Бірнеше күннен кейін әділет министрлігі жағдайға түсініктеме беріп, күдіктінің сот сараптама орталығымен және оның аумақтық бөлімшелерімен еңбек қатынасы жоқ екенін мәлімдеді. Ведомство өкілі мәйітханада күзетшінің 2022 және 2023 жылдары тендерді жеңіп алған жеке компанияда жұмыс істегенін айтты.

Енді қауіпсіздік агенттігінің директоры Әли Сәдірмеков мән-жайға тоқталып, күдікті туралы сөз қозғады.

"Штатта күндізгі ауысымда жұмыс істейтін ресми күзетші бар еді. Оның жұмыс уақыты күн сайын таңғы сағат 7-ден кешкі 7-ге дейін созылды. Ол бір күні түнгі ауысымға адам табылғанын және оған қолма-қол ақшамен ақы беру керек екенін айтты. Біз ол кісіден оғаш нәрселерді байқамадық. Оның ішімдік ішетіні белгілі болды, бірақ нашар адам сияқты көрінбеді. Жасы 40-тар шамасында көрінетін, арық денелі кісі. Бұрын тәртіп сақшысы болғанын айтты. Бұл рас па, жоқ па, білмейміз. Түнде күзет кабинасында отырып, қажет болса, қақпаны ашатын адам керек еді. Ол туралы басқа мәліметтерді білмедік", – дейді Сәдірмеков.

Компания директорының айтуынша, оларға мәйітхана ғимаратының ішіне кіруге болмайды. Агенттіктің күзетшілері тек қақпаларды ашып-жабады екен. Бір күні ол күдіктінің фельдшер формасын киіп алғанын байқапты.

"Мен одан "Санитар болып жұмысқа кірдің бе?" деп сұрадым, ол іште көмек сұрады деді. Ол үшін ақы төлеген шығар деп ойладым, ешкім тегін ештеңе жасамайды ғой. Сосын “Ол жаққа кіруге болмайды, күзет кабинасына отыр деді ме, отырыңыз” дедім", – дейді компания басшысы.

Күдіктінің неліктен ресми жұмысқа орналаспағанын директор айтпады. Сөзінше, түнгі ауысымда мәйітханада жұмыс істегісі келетін адамдарды табу мүмкін емес. Мұндай жұмыстың жалақысы – айына 60 мың теңге, көбі бұған келіспейді.

Күзетшілердің күдікті туралы бір ғана білгені – оның мәйітханаға жақын жерде жалғыз тұратыны. Оның әйелі де, балалары да, ата-анасы да жоқ екен. Алайда әріптестері бұл ақпарат қаншалықты рас-өтірік екенін нақты білмейді.

"Мен оның өмірбаянын оқымадым, одан қағаз талап етпедім. Ол жерде түнде есік ашатын ешкім болмағандықтан, таңға дейін болады деп келістік. Сосын жұмысқа жиі мас болып келгендіктен, оны шығарып жіберді. Бірақ ішуді қоямын деп уәде беріп, кейде өзін жақсы, оғаш қылығы жоқ адам сияқты ұстайтын. Жұмыстан кеткеннен кейін оны көрмедік", – дейді Әли Сәдірмеков.

Агенттік директоры құқық қорғау органдары мен сот-медициналық сарапшыларға дәлелдеме бергенін айтты. Бұл оқиғаның мән-жайы тергеу барысында анықталып жатыр.

Еске салсақ, Алматыда мәйітхана күзетшісі мәйіттерді зорлап, оны видеоға түсіргені айтылды.

Талқылау