Алматылықтар жүргізуші куәлігін алу үшін бірнеше айдан бері кезек күтіп жүр

Алматылықтар жүргізуші куәлігін алу кезінде қиындыққа тап болған. Олардың айтуынша, арнайы халыққа қызмет көрсету орталықтарында (арнайы ХҚКО) емтихан тапсыру кезегін бірнеше ай күтуге тура келеді. Оның үстіне теориялық және практикалық емтиханға жазылу жүйесінде жиі ақау болып, кезек одан әрі созылып кетеді. Бұл туралы Stan.kz ақпарат агенттігі КТК арнасына сілтеме жасап хабарлайды. 

Мәселені авто мектептер де көтеріп отыр. Олардың айтуынша, оқуын аяқтаған әр бесінші курсанттың көлік жүргізуге деген қызығушылығы жоғалады.

Оқыңыз

Қазақстандықтар жүргізуші куәлігіне емтихан тапсыру кезінде жүйеде ақау шыққанына шағымданды Оқыңыз

Алматылық Диас Ахметов авто мектепті бір жыл бұрын аяқтаған. Алайда осы уақытқа дейін жүргізуші куәлігін ала алмаған. Оның айтуынша, басты мәселе – арнайы халыққа қызмет көрсету орталықтарындағы ұзын-сонар кезек. Емтиханға жазылу үшін екі айға дейін күтуге тура келеді. Кейде кезегі келгенімен, емтихан тапсыру мүмкін болмай қалады. Оның сөзінше, жүйеде үнемі ақау болып тұрады.

“Келіп, емтихан тапсыруға тырысамын. Белгіленген уақытым келгенде, талон бойынша барлығын айтамын. Бірақ маған: “Ертең келіңіз” дейді. Демек менің кезегім емтихан тапсыратын уақытқа дейін жетпей қалады. Кейін кезегім келгенде, емтиханды бастап кетемін. Сол кезде қобалжу болып, уақытқа үлгермей, дұрыс тапсыра алмай қаламын”, – дейді Диас Ахметов. 

Авто мектептер де осындай мәселеге тап болған. Олардың айтуынша, биыл жүргізуші куәлігін алу бұрынғыдан да қиындаған.

Оқытушылардың сөзінше, курсанттардың шамамен 20%-ы оқу соңына қарай көлік жүргізуге деген қызығушылығын жоғалтады.

Бос орынға жазылу үшін курсанттар оқытушыларымен бірге күн сайын арнайы халыққа қызмет көрсету орталықтарында қосымшасын тексеруге мәжбүр. Олар емтиханға кем дегенде бір айдан кейін жазыла аламыз деп үміттенеді.

“Оқу екі ай бойы белгіленген тәртіппен өтеді. Бұл жерде ешқандай мәселе жоқ. Одан кейін емтиханға жазылу басталады. Курсант халыққа қызмет көрсету орталықтарында қосымшасы арқылы кіріп, өтініш береді. Бірақ өтініш алған соң бронь жасай алмайды, себебі бос орын үнемі жабық тұрады”, – дейді авто мектеп басшысы Валентина Алиева.

Мәселеден арнайы халыққа қызмет көрсету орталықтарының қызметкерлері де хабардар. Олардың түсіндіруінше, бір жыл ішінде жүргізуші куәлігін алуға ниет білдіргендердің саны екі есеге өскен.

Келушілер санының артуына байланысты орталықтарда теориялық емтихан тапсыруға арналған қосымша кабинеттер жабдықталған. Мамандардың айтуынша, бұл емтихан қабылдау мүмкіндігін арттырып, кезекті қысқартуға мүмкіндік береді.

“Жүктеменің артуының негізгі себебі – кандидаттар санының айтарлықтай өсуі. Сонымен қатар емтиханға жазылу мүмкіндігіне көліктердің уақытша істен шығуы да әсер етеді. Мысалы, практикалық емтихан кезінде жол-көлік оқиғасына түскен көліктер уақытша пайдаланылмайды. Оған қоса қайта тапсыратын кандидаттар, маусымдық сұраныстың артуы және автодромның өткізу мүмкіндігі де кезекке әсер етеді”, – дейді “Азаматтарға арналған үкімет” КЕАҚ даму департаментінің менеджері Нұрсұлтан Шанқаров.

Әзірге кезек қысқармай тұр. Сондықтан мамандар жүргізуші куәлігін алуға асыққан кандидаттарға Қазақстанның басқа қалаларында емтихан тапсырып көруге кеңес береді.

Кейбір алматылықтар кезекті күтпеу үшін басқа қалаға барып, бірнеше күнге пәтер жалдап, емтиханнан өткенше сонда қалып жүр.

Айта кетейік, бұған дейін  Қазақстанда жүргізуші куәлігін алу емтихандарын өзгерту ұсынылған еді.