Алматылық автобустардың лық толатынына шағымданды: Әкімдік бұған жолақысын төлемейтіндерді кінәлады
Алматыдағы №57 қоғамдық көлікте адам қарасының көп болуына байланысты тұрғындар шағым білдірді. Олар қарбалас уақытта автобустың лық толатынын айтып, сыйымдылығы мен қозғалыс жиілігін қайта қарауды сұрап отыр. Бұл туралы Stan.kz ақпарат агенттігі хабарлайды.
Мәселе әлеуметтік желіде қызу талқыланып жатыр. Threads желісінде Рысбек Әлиев есімді қолданушы №57 автобустың қарбалас уақытта шамадан тыс толып кететінін айтты. Ал бұл мәселені шешу үшін дәл осы бағыт қатынайтын қоғамдық көлік санын көбейтуді және қозғалыс аралығын қысқартуды сұрады.
“57-автобустағы адамдардың көптігі жайлы мәселе көтеріп e-otinish-ке де, желіге де жаздым. Жауапты орган адамдардың санына автобус жеткілікті дейді. Олар жол ақысын төлейтіндердің статистикасы бойынша қорытынды шығарады екен. Ал жол ақысын төлемейтіндердің кесірінен басқа ұяты бар азаматтар зардап шегіп отыр. Нәтижесінде кім кінәлі? Өзіміз”, – деп жазды алматылық.
Оған қоса тұрғын алматылықтарды қоғамдық көлікте жолақысын уақытында төлеуге шақырды.
“Ағайын, 120 теңге жол ақыны төлесең кедейленіп қалмайсың. Одан автопарктер байып кетпейді. Ақысын төлеп жүрсең жұмысыңа, оқуыңа қысылмай, жұртпен қырылмай емін-еркін жетесің”, – деп жазды ол.
Оған қоса тұрғын Жол қозғалысын ұйымдастыру және жолаушылар көлігі басқармасына өтініш жолдағанын да айтты.
Әкімдік не дейді?
Ал басқарма мәліметінше, қазір №57 бағытта 2026 жылы шығарылған “Yutong” маркалы 24 автобус қатынайды.
“Бұл бағыттағы жылжымалы құрамды жаңарту жұмыстары 2026 жылдың екінші тоқсанынан басталған. Қазір қоғамдық көлікке ауаны кондиционерлеу жүйесі бар. Газбен жүретін жаңа автобустар шығарылып жатыр. Оның үстіне жаңа автобустардың сыйымдылығы жоғары және жолаушыларға жайлы жағдай жасалған”, – делінген жауапта.
Әкімдік №57 бағытындағы автобустар санын көбейту жоспарда жоқ екенін айтты. Оған қоса олардың жүру аралығы әзірге қысқармайтынын жеткізді.
Басқарманың айтуынша, №57 автобусына мінетін жолаушылар санына қарай маршруттағы 24 автобус жеткілікті деп есептелген.
Сонымен қатар мамандар автобустардың тазалығы мен санитариялық жағдайын тексеріп тұрады екен. Кемшілік анықталса, тасымалдаушыға оны түзету туралы талап қойылады, дейді.
Тұрғындар не дейді?
Әлеуметтік желіде басқа алматылықтар да №57 ғана емес, қаладағы қоғамдық көліктің сыйымдылығына қатысты пікір білдірген.
Бір тұрғын автобустардың шағын болғанына шағымданып, қарбалас уақытта жолаушылардың бір-біріне қысылып тұратынын жазды.
“Тым құрығанда көлемін ескеріңіздерші. Тез жүреді, әрине, бірақ ішіне сыймаймыз. Бірінің үстіне бірі мініп алайын деп тұрады. Тұрып қалсаң да бір аяққа тұратын орын жоқ. Автобус ары-бері теңселгенде адамдар бірін-бірі басып жатады”, – деп жазды ол.
Тағы бір тұрғын №57 бағытында өз қыздарының телефоны жоғалғанын айтып, автобустағы қауіпсіздік мәселесін көтерген.
“№57 қоғамдық көлікке үлкен автобус керек. Осы 57-де қыздарым екі Iphone жоғалтты. Табылмады. Жүргізушілер тек жазбаны қосып қояды: сақ болыңыз, ұрылар бар6 деген. Видео камераның жазбасын көрсетпейді, еш болыспайды. Сосын қатты айдайды. Жазда іші ыстық, салқындатқыш қоспайды. Ал қыста не қатты ыстық, не мүлде суық. Жүргізуші біліктілігін арттырып, үлкен автобустар шығару қажет”, – деді тұрғын.
Кей жолаушылар автобуста жолақысын төлемейтіндер көбейген сайын, бұл қоғамдық көлікке сұранысты статистикасына әсер етуі мүмкін екенін жазды.
“Жол ақысын төлеген адам санына байланысты, автобус қажеттілігі шығады. Күніне 1 000 адам мініп, оның 100-і ғана төлесе, сол 100 адамға автобус саны жеткілікті деп есептеледі. Жол ақысы = автобус саны. Жолаушылардың өзіне тікелей қатысты болып тұр бұл мәселе. Өкінішке қарай, көбісі тексермесе, жол ақысын төлемей отыра береді”, – деп жазды бірі.
Аталған жағдайға қатысты Stan.kz тілшісі Алматы қаласы әкімдігіне сауал жолдады. Әзірге жауап күтіп отырмыз.
