"Газа деген жер енді мүлде жоқ" – Ердоған Германия канцлеріне мәлімдеме жасады
Түркия президенті Режеп Тайып Ердоған Берлинде Германия канцлері Олаф Шольцпен кездесуінде Израильдің соққыларының нәтижесінде Газа секторы толығымен жойылғанын айтты. Бұл туралы Stan.kz ақпарат агенттігі Anadolu басылымына сілтеме жасап хабарлайды.
Фото: Instagram Ердоған
"13 мың палестиналық балалар, әйелдер мен қарттар қаза тапты. Газа деген жер енді жоқ, ол жердің бәрі қирады. Израиль мыңдаған палестиналықтарды өлтіріп жатыр, ауруханаларға, ғибадатханаларға, шіркеулерге шабуыл жасауда. Мұсылман ретінде мені осы мәселе алаңдатады. Сіз христиан ретінде осы шіркеулердің қиратылуына алаңдамайсыз ба? Неге айтпайсыз? Біз еврейлер, христиандар және мұсылмандар арасында кемсітушілік жасамауымыз керек", – деді Ердоған.
Ол халықаралық қауымдастықтың барлық мүшелері Таяу Шығыста әділ және тұрақты бейбітшілікті қамтамасыз ету үшін жауапкершілікті өз мойнына алуы керектігін баса айтты.
"Болып жатқан жағдайға қатысты үнсіз қаламыз ба? Қолымыз бен тіліміз байланып қалса, тарих алдындағы жауапкершілікті көтере алмаймыз", – деді.