Елімізде 75 адам қызылшаға шалдықты: Басым көпшілігі - вакцинацияланбаған балалар

Қазақстанда қызылшаның 75 жағдайы зертханада расталды. Науқастардың көпшілігі –  вакцинацияланбаған балалар деп хабарлайды Stan.kz ақпарат агенттігі 31-арнаның Информбюро жаңалықтар бағдарламасына сілтеме жасап.

Дәрігерлер ақпан айынан бастап аурудың деңгейі артқанын анықтады. Бұл еліміздегі қызылшаның алғашқы өршуі емес. 2019 жылы бұл вирусты 13 мыңнан астам адам жұқтырды. 

Қазақстанда қызылша бойынша эпидемиологиялық жағдай байқалады. Бұл – жұқпалы ауру. Оның белгілерін әдеттегі ЖРВИ-ден ажырату қиын. Тек асқынған кезде қызыл бөртпелер шыға бастайды. Әлемде қызылшаға қарсы ем жоқ. Оның салдары энцефалит пен пневмонияны тудырады, тіпті өлімге әкелуі мүмкін. Бүгінгі таңда Алматы қаласы, Түркістан және Жетісу облыстарында қызылшамен ауыратындар көп.

“Алматыда жағдай ең нашар, 46 жағдай тіркелген. Елімізде жалпы қызылша жұқтырғандардың 90%-ы балалар болса, оның 70%-ы, яғни 32 бала Алматыда қызылшаға қарсы жоспарлы профилактикалық екпе алмаған”, – деді вакцинамен басқарылатын инфекцияларды бақылау басқармасының басшысы Нұршай Әзімбаева.

Бүгінгі таңда 145 адам қызылша ауруының күдігімен тіркелді. 75-і расталды. Олардың басым көпшілігі – вакцинациядан бас тартқандар, қарсы көрсетілімдері бар немесе әлі алты жасқа толмаған балалар.

Сарапшылардың айтуынша, вакцинацияланған бала ауырып қалса да, аурудың ағымы жеңілірек болады.

Көптеген өңірлерде жағдай тұрақты, қазақстандықтардың қызылшаға қарсы иммунитеті қалыптасқандықтан, балаларды онлайн оқуға жіберілмейді.

“Егер бір мезгілде бірнеше жағдай тіркелсе, онда Алматы қаласының аудандарындағы санэпидбақылау басқармасы тиісті іс-шараларды өткізуге қаулы береді, алайда мектептерді жабу туралы жоспар жоқ”, – деп мәлімдеді Алматы қаласы санитарлық-эпидемиологиялық бақылау департаменті басшысының орынбасары Әсел Қалықова.

Қызылшаның өршуіне қарсы шаралардың бірі – вакцинацияланбағандарды анықтау. Бүгінгі таңда 17 жасқа дейінгі 94 мыңнан астам баланың қызылшаға қарсы екпесі жоқ. Вакцинация жұмыстары жалғасуда, 15 мыңға жуық адам егілді.

Қызылшаның өршуі бірнеше жыл ішінде вакцинацияланбағандардың саны жинақталғандықтан пайда болады.

Дәрігерлер коронавирус пандемиясының басталуымен Қазақстанда ғана емес, бүкіл әлемде балалар арасында жоспарлы екпелердің қамтылуы төмендегенін айтады. Сондықтан елде 2021-22 жылдары вакцинация жүргізілді. Бірақ әлі күнге дейін көпшілігі қызылшаға қарсы вакцинация алмаған.