"Бесінші сыныптан бірге оқыдық": Сыныптасына шампур тығып өлтірген жасөспірім алғаш рет оқиға туралы айтып берді

Алматы облысында мектеп бітіру кешінде сыныптасы Әлібидің өліміне кінәлі деп танылып, 10 жылға бас бостандығынан айырылған жасөспірім Turkistan TV-ға берген сұхбатында оқиға болған түн мен қамаудағы өмірі туралы айтып берді. Бұл туралы Stan.kz ақпарат агенттігі хабарлайды.

Оның сөзінше, соңғы қоңыраудан кейін түлектер көлік жалдап, кортежбен жүріпті. Кейін сыныптастарымен бірге жалға алынған үйде мектеп бітіру кешін атап өткен.

“Таңғы тоғыздар шамасында үйден шығып, мектепке бардық. Онда соңғы қоңырау өтті. Кейін барлық түлек жиналып, көлік жалдап, кортежбен жүрдік. Үй жалдап, тойладық. Ішімдік іштік”, – деді ол.

Сотталушының айтуынша, кеш барысында отырысқа бұрынғы мектеп түлектері келген. Кейін жастар арасында жанжал шыққан.

“Алдымен басқалар арғы жақта ерегісіп жатқан еді. Кейін өз арамызда да жанжал басталды. Жанымда досым болды, сол қайтыс болған жігіт. Ол мені ажыратып жүрген еді. Сол кезде шампур оған кіріп кетті”, – деді жасөспірім.

Ол марқұм Әлібимен бесінші сыныптан бері бірге оқығанын жеткізді.

“Онымен бесінші сыныптан бастап бірге оқыдық”, – деді ол.

Сотталған жасөспірім өзіне тағайындалған жаза мерзімі ұзақ болғандықтан, қамауда жүргенде ата-анасының қартайып қалуынан қорқатынын айтты.

“Маған берілген жаза мерзімі ұзақ. Түрмеден шыққанша әке-шешем қартайып қала ма деп қорқамын. Күндеріміз тез өтсе екен деп тілейміз. Ата-анамызға тезірек жетсек екен дейміз”, – деді ол.

Оқыңыз

Мектеп бітіру кешінде шампур тығып алған: Алматы облысында Әлібидің өліміне күдікті жасөспірім 10 жылға сотталды Оқыңыз

Жасөспірім қамауға алғаш түскен кезде қатты қорқыныш сезінгенін де жасырмады.

“Алғаш түскен кезде жүрегім қатты соғып, кеудем қысылатын. Қатты қорқатынмын. Үш-төрт айдан кейін ол сезім басылды. Алғашында есік ашылса болды, оянып кететін едік. Қазір бәрі басылды”, – деді сотталушы.

Сұхбат барысында ол анасымен видеоқоңырау арқылы сөйлесіп, жақындарын сағынғанын жеткізді.

“Бәрі жақсы. Сізді жақсы көремін ғой, анашым. Қалдарыңыз қалай? Не істеп жатырсыздар? Қарындасым не істеп жүр? Бекзам ағам ше? Сәлем айтыңыздар. Менде бәрі жақсы, шүкір. Уайымдамаңыздар. Сіздерді сағындым. Тезірек қастарыңызға барып, үйге оралсам екен деп тілеймін”, – деді ол анасына.

Мән-жайы

Еске салайық, қайғылы оқиға 2025 жылғы мамырда Алматы облысының Долан ауылында болған. Мектеп бітіру кешінде 17 жастағы Әліби кәуап пісіретін шампурдан жарақат алып, жедел жәрдем келгенге дейін көз жұмды.

Алматы облысының қылмыстық істер жөніндегі мамандандырылған ауданаралық соты жасөспірімді көрінеу кәмелетке толмаған адамды өлтіргені үшін кінәлі деп танып, 10 жылға бас бостандығынан айырды. Кейін облыстық сот үкімді өзгеріссіз қалдырды. Үкім 2026 жылғы 14 сәуірде заңды күшіне енді.