"Бастықтың нақсүйерісің деп қаралады": Шымкент ДП баспасөз хатшысы өз-өзіне не себепті қол жұмсағанын айтты
Желіде аудиосы тарап, үстінен қылмыстық іс қозғалғаннан кейін өз-өзіне қол жұмсамақ болған Шымкент қалалық полиция департаменті баспасөз қызметінің жетекшісі қазір жағдайының қандай екенін айтты, деп хабарлайды Stan.kz ақпарат агенттігі.
Мөлдір Бекеева өзімен болған оқиғаның мән-жайын айта келе өз өмірі үшін ғана емес, жақындары үшін де алаңдайтынын жеткізді. Сондай-ақ полиция департаментінің баспасөз хатшысы президенттен араша сұрады. Бұл туралы ол Facebook-тағы парақшасында баяндады.
Баспасөз хатшысы әлі де дәрігерлердің бақылауында, жүйелі түрде ем қабылдап жатқанын, себебі көп мөлшерде дәрі ішкендіктен, ішкі ағзасына қатты зиян келгенін айтады. Сондықтан тұрақты түрде ем қажет көрінеді.
Жазбасында журналист не себепті өмірімен қоштаспақ болғанын айта келіп, көпшіліктен әділдік үшін күресуге көмек сұрайтынын мәлімдеді.
"Адам тағдырымен ойнап, қолдан қылмыстық іс ашып, қайта-қайта қаматамын деп қудалап, соңында қамауға шешім қабылдағанын көргенде менің басқа амалым қалмады. Әділдікті өз өмірімнен де артық көрдім, қидым! Өмірде әділдік пен опасыздық қай кезде де қатар жүрген, бұл да бір Алланың берген сынағы деп өзімді жұбатып-ақ жатырмын... Сіздерден әділдік үшін күресуге көмек сұраймын... Енді шындықты, ақиқатты еш қорықпай ашып айтуға болады!" — делінген жазбада.
Мөлдір Бекеева үстінен қылмыстық іс қозғалуға себеп болған шулы аудиожазбаға қатысты да түсініктеме беріп өтті. Ол желіде тараған аудионың жала екенін айтып отыр. Ал аудиодағы дауыс иесі — Мақсат есімді қызметкері сол кездегі полиция департаментінің бастығымен байланысың бар деп, қаралап келді дейді.
"Бұл — барып тұрған кибербуллинг, кесіп-кесіп арнайы техникалық өңдеуден өткізіп, монтаждап, соңында мені "құбыжық" етіп көрсеткен. Шынтуайтында, бұл "Мақсат" есімді қызметкер жауапкершілік пен сауаттан жұрдай, апталап жұмысқа келмей, "жұмыс уақытында қайда жүрсің" деп сұрасаң бітті... мені кеп балағаттап, "Менің "крышам" сенің "крышаңнан" әлдеқайда мықтырақ" деп, тіпті сол кездегі департамент бастығы "Е. Жұмаханбетовтің нақсүйерісің" деп еш негізсіз қаралайтын... Қай қыз баласы болсын, мұндайда арын таптатып қарап отырмайтыны анық... Бірақ бұның есі дұрыс па, неге өзінен-өзі мені кеп балағаттап, соншама ауыр сөздер айтады деп ойлайтынмын. Сөйтсем, ойында бір "қитұрқы жоспары" — айла-амалы болған екен ғой. Осы күнге дейін онысын осында жазуға, тіпті айтып, ақталуға арым бармады! Өзімнің арым мен тазалығымды дәлелдеу үшін тіпті кез келген гинеколог-экспертизаға да баруға дайынмын!" — деп жазды Мөлдір Бекеева.
Баспасөз хатшысы бұл аудиожазба үшін өзіне қол салмас бұрын бар шындықты полиция департаментінің қазіргі бастығы Қайрат Дәлбековке айтып, ішінара тәртіптік жүйеде шешпек болғанын айтқан.
"Бірақ генерал мырза мені тыңдағысы да келген жоқ! "Орныңнан алып, қылмыстық іс қозғатамыз" деді. Содан тергеу жөніндегі орынбасары қайта-қайта хабарласып, анықтау басқармасының бастығы хабарласып, "Үстіңізден ҚР ҚК 378-бабының 1-бөлігі (Билік өкілін қорлау) бойынша іс қозғалды, тағы да біразынан, жүргізушілерден басқадай арыз алып, бәрібір қаматамыз деп жатыр" деді. Қайта-қайта қаматамыз дегені несі? Сонда әділдік қайда? Бұған қалай төзуге болады? Қызмет орным үшін. Екі ай бойғы қысым мен қудалау… шегіне жетті! Үстімнен іс қозғалды, енді жазықсыз қамалып кеткенше өлгенім артық екенін түсіндім, өзіме қол салдым... Шындық — осы!" делінген жазбада.
Мөлдір Бекееваның мәлімдеуінше, қалалық полиция департаментінің басшысы ауысқалы бері командалық ауыс-түйіс орнап, кейбір қызметкерлерден маза қашыпты. Ал жақында ғана Ішкі істер министрі полиция департаментінің бастығына тек сөгіс беріп шектелді деп отыр. Оның жазуынша, Шымкенттің бас полицейінің артында "мықты" адамдар тұр екен.
"Командалық" көшу, "шәй-майға" жинау дегенді мүлдем естімегенмін! Ал Қайрат Дәлбеков келгеннен кейін, "шай-майға" жеке құрамнан жинаймыз" деген сөзін Антикор жедел бейнежазба арқылы дәлелдеп берді емес пе? "Командасымен" көшіп кеп, жемқорлыққа жол беріп отырған генералға тек "сөгіс" берумен шектелгенді қалай түсінуге болады? Неге әлі қызмет орнында департаментті басқарып отыр? Полицияның өзі қылмыс жасаса, халық енді кімге сенеді? Қ. Дәлбеков — Елбасы Н. Назарбаевтың құдасы, Әнипа Назарбаеваның ұлына қыз бергенін бәрі біледі. Арқасында "мықты" адамдар тұр! Енді кеп маған қатысты жүріп жатқан тергеу амалдарына қысым жасап, араласса не болады? Себебі қазіргі кезде тергеу амалдары жүріп жатқанына қарамай, істің ақ-қарасы анықталмай жатып, Ішкі істер министрлігінің өзі менің айтқандарымды жоққа шығарып, тіпті онысын БАҚ-қа таратты. Мен енді ІІМ-ге де сенбеймін!" — деп жазды ол.
Бір өлімнен аман қалған ол енді тек өз өмірі үшін ғана емес, жақындары үшін де алаңдаймын деп отыр.
"Елдің алдында ақиқатты айтып отырып, қазір өзімнің ғана емес, жақындарымның да өмір қауіпсіздігі үшін алаңдаймын. Қорқамын! Сондықтан бұл істі Бас прокурор Б.Н.Асылов мырза қадағалап, ҚР Конституциясының кепілі — Президентіміздің өзі қатаң бақылауға алуын өтініп, сұраймын!" — делінген жазбада.
Баспасөз хатшысы өз жазбасында Сыбайлас жемқорлыққа қарсы қызметке барып, арыз жазып кеткенін атап өткен. Алдағы уақытта арнайы баспасөз мәслихатын өткізетінін де жеткізді.
Айта кетсек, Шымкент қаласы полиция департаменті баспасөз қызметінің жетекшісі Мөлдір Бекеева деп көрсетілген аудио жазба әлеуметтік желіде үлкен талқылауға түскен. Онда әйел адамның қызметкеріне жекіп сөйлеп, былапыт сөздер айтқанын естуге болады. Тіпті жұмыстан босату жөнінде мәселе қарайтындығын жеткізген дауыс иесі, әдеп нормаларын сақтамай, аузына келген ағат сөздерді қарша боратқан. Бұл жазбадан кейін оның үстінен қылмыстық іс қозғалды.
Бекеева өзіне қатысты даудан кейін өз-өзіне қол жұмсамақ болды. Қазіргі таңда оның денсаулық жағдайы белгісіз.
Ведомство өкілі өзіне қол салмас бұрын Facebook желісінде жазба жариялаған. Өз жазбасында Мөлдір Бекеева ПД жаңа басшылығын айыптап, мұндай қадамға баруына мәжбүр еткенін жеткізді.
Бүгінгі таңда сыбайлас жемқорлыққа қарсы қызмет М. Бекееваның өзін-өзі өлтіруге оқталу фактісі бойынша ҚК 105-бабы 1-бөлігі (жәбiрленушiнi қорқыту, оған қатыгездiкпен қарау немесе оның адами қадір-қасиетiн үнемі қорлау арқылы адамды өзiн-өзi өлтiруге дейін немесе өзiн-өзi өлтiруге баруға дейiн жеткiзу) бойынша сотқа дейінгі тергеу жүргізуде.