Қазақстанда жолаушы мінген ұшқышсыз әуе таксиі алғаш рет көкке көтерілді
Астанада Қазақстан тарихында алғаш рет жолаушы мінген ұшқышсыз әуе таксиі сынақ ретінде көкке көтерілді. Демонстрациялық ұшу "Future Games 2026" халықаралық турнирі аясында арнайы белгіленген аумақта өтті. Бұл туралы Stan.kz ақпарат агенттігі хабарлайды.
Сынаққа шығарылған EH216-S деп аталатын электрлі әуе аппараты тік көтеріліп, тік қона алады. Ол екі адамды тасымалдауға арналған. Әуе көлігінің ең жоғары жылдамдығы сағатына 130 шақырым, ал бір қуатта 35 шақырымға дейін ұша алады.
Алғашқы кезеңде мұндай әуе көліктерін туристік бағыттарда пайдалану жоспарланып отыр. Яғни, жолаушылар Қазақстанның табиғи және тарихи көрікті жерлерін аспаннан тамашалай алады. Ұшу ұзақтығы 5-тен 30 минутқа дейін болады.
ОқыңызБолашақта ұшқышсыз әуе таксилерін тек туризмде ғана емес, жедел медициналық көмек көрсетуге, дәрі-дәрмек жеткізуге, өрт сөндіруге және логистика саласында қолдану көзделіп отыр.
Жоба аясында мұндай әуе көліктерін алдағы уақытта Қазақстанда өндіру де жоспарланған. Бұл жаңа жұмыс орындарын ашып, жоғары технологиялы өндірісті дамытуға мүмкіндік береді.
Қазір Көлік министрлігі ұшқышсыз әуе көліктерін қауіпсіз пайдалану үшін қажетті заңнамалық және инфрақұрылымдық жұмыстарды жүргізіп жатыр. Егер жоба сәтті жүзеге асса, болашақта әуе таксилері еліміздегі қоғамдық көліктің жаңа түріне айналуы мүмкін.
Еске салайық, бұған дейін Қазақстан 2026 жылы қалалық әуе мобильдігін (Urban Air Mobility) реттейтін заңнамалық түзетулерді қабылдап, аэротакси, жолаушылар дрондары мен ұшқышсыз әуе көліктерін дамытуға құқықтық негіз қалыптастырған алғашқы елдердің бірі атанды. Заңда вертипорттар, қалалық әуе мобильдігі аймақтары және ұшқышсыз қозғалысты басқару жүйесі сияқты жаңа ұғымдар енгізілді. Алайда аэротакси мен жүк дрондарын жаппай пайдалану қажетті сынақтар мен тәжірибелік құқықтық режим аяқталғаннан кейін ғана жүзеге асады.
