Ақтауда 14 жастағы оқушыны ұрып-соғу ісі бойынша күдіктінің әпкесі мәлімдеме жасады
Ақтауда жасөспірімдер арасындағы жанжалдың мән-жайын полиция анықтап жатқан кезде, төбелеске қатысушылардың бірінің туысы көпшілік алдында өз ұстанымын білдірді. Бұл туралы Stan.kz ақпарат агенттігі хабарлайды.
Кәмелетке толмаған күдіктінің әпкесі інісінің әрекетін ақтамайтынын және оқушыны ұрып-соғуға қатысқаны үшін заң алдында жауап беруі тиіс екенін айтты. Алайда оның сөзінше, оқиғаның жұртшылыққа белгісіз тағы бір қыры бар.
Ол жанжалдың видеосы таралмай тұрып, інісі мен оның досына сегіз-тоғыз жасөспірімнен құралған топ шабуыл жасағанын алға тартты. Оның айтуынша, сол топтың арасында кейіннен бетінен тепкі алған 14 жастағы оқушы да болған.
Әпкесінің мәліметінше, осы оқиғаларға дейін оның інісіне бас сүйегі сүйектерінің сынуы диагнозы қойылған.
"Егер інім өзін қорғауға әрекет жасамағанда, бұл оның өлімімен аяқталса, оған кім жауап берер еді?" – дейді ол.
Жасөспірімнің отбасы құқық қорғау органдарынан жанжалдың барлық мән-жайын жан-жақты тексеріп, әрбір қатысушының рөлін анықтауды және олардың әрекеттеріне құқықтық баға беруді сұрады. Олардың пікірінше, тек оқушыны соққыға жыққандардың ғана емес, жанжалды алғаш болып бастағандардың да жауапкершілігі қарастырылуға тиіс.
Еске салайық, бұған дейін 14 жастағы жасөспірімнің туыстары екі кәмелетке толмаған баланың оны ұрып-соғып, болған оқиғаны жәбірленушінің телефонына түсіріп, кейін видеоны оның досына "Сыртқа шықпасаң, сен де осындай күйге түсесің" деген қорқытумен жібергенін хабарлаған еді. Аталған дерек бойынша қылмыстық іс қозғалған.
"Шәй құйып, сәлем салады, келіндік қызмет атқарады": Индонезиялық келін алған отбасы екі елдің тойы мен ерекше дәстүрлерін көрсетті
