Алматы экономикасы үшін жарықсыз өткен бір минуттың құны шамамен 71 миллион теңгеге тең

Алматыдағы экономикалық белсенділіктің толық тоқтаған әрбір минуты шартты түрде шамамен 71 млн теңгеге бағаланады. Мұндай есепті PROTENGE Telegram-арнасы қаланың 2025 жылғы жалпы өңірлік өнімі (ЖӨӨ) негізінде келтірді. Бұл туралы Stan.kz ақпарат агенттігі хабарлайды.

Алматының 2025 жылғы ЖӨӨ көлемі 37,28 трлн теңге болған. Осы көрсеткішті бір жылдағы 365 күнге, тәуліктегі 24 сағатқа және сағатына 60 минутқа бөлгенде, қаладағы экономикалық белсенділіктің әр минутына шамамен 70,9 млн теңге келеді.

Осы есеп бойынша:

• 10 минут – шамамен 709 млн теңге;
• 30 минут – шамамен 2,1 млрд теңге;
• 1 сағат – шамамен 4,25 млрд теңге;
• 2 сағат – шамамен 8,5 млрд теңге.

Алайда бұл сомалар блэкауттан келген нақты экономикалық шығынды білдірмейді. Себебі тоқтаған экономикалық белсенділіктің бір бөлігі электр қуаты қалпына келгеннен кейін қайта жүзеге асуы мүмкін. Сонымен қатар кейбір кәсіпорындар резервтік электр көздерін пайдаланып, жұмысын жалғастыра алады. Сондықтан бұл есеп тек электр қуатының жаппай өшуі кезінде тәуекелге ұшырайтын экономикалық белсенділіктің шартты көлемін көрсетеді.

14 тамызда Алматыда электр қуаты жаппай өшіп, Бостандық, Наурызбай, Әуезов және Алатау аудандарындағы тұтынушылар жарықсыз қалды. Алматы облысының бірқатар аудандары да электр энергиясынсыз қалды. Кейбір мәлімет бойынша, шектелген қуат көлемі шамамен 300 МВт болған.

Апаттың салдары тұрғын үйлер мен кәсіпорындармен ғана шектелген жоқ. Электр қуатына тәуелді кейбір бағдаршамдар жұмыс істемей, жолдарда кептеліс пайда болды. Бірқатар қиылыста қозғалысты полиция қызметкерлері реттеді. Сондай-ақ сорғы станцияларының уақытша тоқтауына байланысты кей аудандарда су қысымының төмендеп, су беруде мәселелер туындады.

Кейін электр қуатының өшуіне байланысты жағдайдың Орталық Азияның энергетикалық жүйесіндегі ақаумен байланысты екені белгілі болды. KEGOC мәліметінше, Қырғызстандағы Тоқтоғұл СЭС-інің екі гидрогенераторының ажыратылуы Қазақстанның электр энергетикалық жүйесінде шамадан тыс жүктеме туғызып, оңтүстік аймақтың электр жүйесінен ажырауына әкелген.