7,2 миллиард теңге: Ақтөбеде жергілікті тұрғындар шағымынан кейін шошқа фермасына көлемді айыппұл салынды

Бестамақ ауылындағы шошқа фермасының Ақтөбе облысының экологиясына келтірілген шығыны 7,2 миллиард теңгеге бағаланды. Шошқа фермасына айыппұл төлеуге бір ай уақыт берілді, деп хабарлайды Stan.kz ақпарат агенттігі "Мой город" басылымына сілтеме жасап. 

Облыстық экология департаментінің басшысы Нұржан Аққұл кәсіпорынды тексеру нәтижелерімен бөлісті.

 "Парижская коммуна 21" ЖШС кент маңындағы траншеяларда көмген өндірістік және биологиялық қалдықтардың ауданы 5,6 гектарды құрады.

"Бұл алаңның ластануына байланысты шығын 14 миллион теңгені құрады, осыған байланысты қылмыстық іс басталды. Тексеру барысында траншеяның бір бөлігі қазылып, сол жерден 189 тонна қалдық шығарылды. 2018-2019 жылдары кәсіпорын қоршаған орта эмиссиясына рұқсатсыз жұмыс істеген", - деді Нұржан Аққұл.

Тексерушілер анықтағандай, жобада мәлімделген 40 мың бас шошқаның орнына фермада 50 мыңнан астам жануар болған. Әкімшілік істер қозғалды, оның ішінде ЖШС-нің экология департаменті сұраған мәліметтерді ұсынбау фактісі де бар.

"Барлық бұзушылыққа байланысты шығын 7 миллиард 27 миллион теңгені құрады. Олар бір ай ішінде өтелуі керек, егер өтелмесе, сотқа жүгінеміз. Сондай-ақ, кәсіпорынға бұзушылықтарды түзету туралы ұйғарым берілді, егер олар орындалмаса, сот арқылы оның жұмысын тоқтата тұруды талап етеміз", - деді Ақтөбе облысының бас экологы.

Айта кетейік, "Париж коммунасы 21" кәсіпорнының жұмысы 2011 жылдан бері тексерілмегені анықталды.

Траншеядан шығарылған 189 тонна биоқалдықтардың 39 тоннасы химиялық әдіспен кәдеге жаратылды, бұл жұмыс жалғасуда, деп хабарлады Ақтөбе облыстық ветеринария басқармасының басшысы Кеңес Қанабаев.

Ақтөбе облысының ветеринарлық инспекция басшысы Темірбек Нұртазиннің ақпараты бойынша, шошқаның бір басын сойған кезде 8,5 килограмм қалдық қалады. Бестамактағы шошқа фермасында күніне 300 бас шошқа сойылған, сондықтан күнделікті қалдықтардың көлемі 2550 килограмды құрады.

Ет және сүйек қалдықтарын экструзиялау және шығару желісінің қуаты сағатына 500 килограмды құрайды, барлық қалдықтарды өңдеуге және жемге жіберуге болады, бірақ бұл жасалмады. Ферманың жанынан 5700 килограмм жүк табылды, оларды өртеп жіберді, деді Темірбек Нұртазин.

Бестамақ ауылындағы шошқа фермасына қатысты жанжал қараша айының ортасында пайда болды. Аудандағы иіс пен қоқыстан шаршаған жергілікті тұрғындар кешенді жабуды талап етті. 

Олар шошқаларды сойғаннан кейін қалдықтарды ауылдың маңындағы траншеяларға және олардың қасына әкеліп, Елек өзеніне құбыр арқылы тастағанын видеоға түсіріп алған.

Ақтөбе облысының әкімі Оңдасын Оразалин істі жеке бақылауға алып, сол кезде шаруашылық қызметінің бағытын өзгерту немесе оны жабу туралы мәселе қою қажетін мәлімдеді.