Қазақстандық оқулықтарда Жасанды интелектпен орындайтын тапсырмалар пайда болды: Ал ата-аналар қарсы шығып жатыр
Қазақстандық 3-сынып оқушыларына жасанды интеллект көмегімен ертегі құрастыру тапсырылғанына наразы болды. Оның пікірінше, бастауыш сыныптан бастап балаларға шығармашылық жұмысты жасанды зиятқа орындатып үйрету, олардың өз бетінше ойлануына кері әсер етуі мүмкін. Бұл туралы Stan.kz ақпарат агенттігі хабарлайды.
Желі қолданушысы мән-жайды Threads парақшасында баяндады. Оның сөзінше, 3-сынып оқушыларына этикалық нормаларды сақтамаған бала туралы ертегі құрастыру тапсырылған. Ол үшін балалар жасанды интеллектке ертегі жазуға арналған промпт дайындауы керек болған.
“Масқара, үшінші сынып қой! Балаларға этикалық нормаларды сақтамаған бала туралы ертегі құрастыру үшін Жасанды интеллектке промпт жазу тапсырылыпты. Бұл – Оқу-ағарту министрлігі диктант, мазмұндама және шығарма жазуға басымдық беріп жатқан кезеңде болып отыр. Баланы өз бетінше ойлауға, қиялдауға және жазуға қалай үйретеміз? Бастауыш сыныптың өзінде осы жұмыстың бір бөлігін жасанды интеллектке тапсырып қойсақ”, – деп жазды ол.
“Алматыкітап” баспасы қалай жауап берді?
Аталған жағдайға “Алматыкітап” баспасы жауап берді. Олар тапсырманың мақсаты оқушының шығармашылық жұмысын жасанды интеллектке орындату емес екенін мәлімдеді.
Баспа мәліметінше, бала алдымен кейіпкерлерді өзі ойлап тауып, оқиғаның желісін анықтауы керек. Содан кейін жасанды зиятқа сұрау құрастырып, алынған нәтижені талдап, оқиғаның қалай өрбуі мүмкін екеніне қатысты өз нұсқасын ұсынады.
“Осылайша, оқушы дайын ертегіні алмайды. Керісінше, цифрлық құралды қолдануды үйреніп, алынған ақпаратты сыни тұрғыдан бағалайды. Оған қоса өзінің шығармашылық идеясын жетілдіреді”, – деп түсіндірді баспа.
Сонымен қатар баспа бұл тапсырманың "Цифрлық сауат және жасанды интеллект" пәнінің мазмұнына сәйкес келетінін айтты. Аталған пән цифрлық технологияларды, интернетті қауіпсіз пайдалануды және цифрлық өнімдер жасауды үйретуге бағытталған.
Шығарма жазу маңызды болып қала ма?
“Алматыкітап баспасы” дәстүрлі оқыту әдістері – диктант, мазмұндама, шығарма және өз бетінше орындалатын жұмыстар – бұрынғыдай маңызды екенін жеткізді. Баспаның пайымынша, жасанды интеллект элементтерін оқу үдерісіне енгізу бұл әдістерді алмастырмайды. Керісінше, балалардың сыни ойлауын және цифрлық дағдыларын дамытуға көмектесуі керек.
Қазіргі мектептің міндеті – балаларды технологиялық прогрестен оқшаулау емес. Мұғалімнің дұрыс бағыт беруімен жаңа технологияларды саналы, қауіпсіз әрі жауапкершілікпен қолдануға үйрету”, – деді “Алматыкітап баспасы”.
Ата-аналар не дейді?
Бұл жағдайға қатысты ата-аналардың пікірі екіге бөлінді. Бірі, әлем дамып жатқандықтан балалар жасанды зиятты қолданып үйренуі керек дейді. Ал енді бір ата-аналар тобы 3-сынып оқушылары үшін Жасанды интеллектіні меңгеру ауыр екенін жеткізді.
“Жасанды интеллектке қаншалықты қарсы болсам да, өкінішке қарай, әлем дамып жатыр. Жасанды интеллек мүмкіндігі шексіз. Кейде осы нәрсе мені шошытады. Бірақ балалар заман ағымынан қалмауы керек. Олар жасанды интеллекінің не екенін біліп, оны қолдануды және жасанды интеллект жасаған дүниелерді ажырата алуды үйренуі қажет. Балалардың ойлау қабілеті икемді, жаңа нәрсеге тез бейімделеді. Сондықтан олар мұндай технологияларға да жылдам үйренеді деп ойлаймын. Адамзат жасанды интеллектіні игілікке жаратады деп үміттенемін”, – деп жазды ата-аналардың бірі.

“Жасанды интеллект өміріміздің ажырамас бөлігіне айналады. Сондықтан оны оқулықтарға енгізіп, балаларды ерте жастан үйрету жаман емес, керісінше, пайдалы деп ойлаймын. Кейде әлемнің өзгеріп жатқанын, біздің буынға тиімді болған әдістердің балаларымызға енді жарамауы мүмкін екенін ойлаймын. Ұлым жасанды интеллектінің көмегімен бірнеше сағаттың ішінде ойын жасап шықты. Сол кезде оның өмірі біздікінен мүлде өзгеше болатынын түсіндім”, – деп жазды бірі.

“Ұлым төртінші сыныпта оқиды. Ол Claude жасанды интеллектісіне промпт жазып, соның көмегімен презентация дайындайды. Кейін оны өзі жақсылап түсіндіріп, ауызша қорғайды. Бұған тыйым салынбаған. Керісінше, оұған қуанамын: компьютер алдында он сағат отырғанша, тапсырманы жарты сағатта орындай алады. Оның үстіне, мұны өзіміз үйреттік. Технология дамып жатқанда, балалардың оны меңгергені дұрыс. Өзіміз де ChatGPT-сіз көп нәрсені істей алмай қалдық қой. Балалар үйрене берсін, ертең олар ғарышты да игеруі мүмкін”, – деп жазды ата-ананың бірі.

“Өмірлік ұстанымдар, достың бойында болуы керек қасиеттер” деген тапсырмаларға келсек, бұлардың бәрі маңызды екені рас. Әдептілік пен қоғамда өзін дұрыс ұстауды үйрену де қажет. Бірақ үшінші сынып оқушысына мұндай ұғымдарды түсіну әлі қиын. Меніңше, бұл жастағы балаларға жасанды интеллект мүлде қажет емес”, – деп жазды қарсы тараптың бірі.
Айта кетейік, бұған дейін Қазақстандық оқушыларға теріс басылған оқулық берілгені туралы жазған едік.
