Жыл басынан бері полицияға тұрмыстық зорлық-зомбылық туралы 100 мың шағым түсті - ІІМ

Ішкі істер министрі Марат Ахметжанов үкімет отырысында жыл басынан бері тұрмыстық зорлық-зомбылық туралы 100 мыңнан астам шағым түскенін айтты, деп хабарлайды Stan.kz ақпарат агенттігі. 

Ахметжановтың айтуынша, тұрмыстық зорлық-зомбылық оқиғалары көбінесе Шымкент, Астана, Алматы қалаларында, сонымен қатар Қарағанды, Павлодар және Қостанай облыстарында болған.

“Алайда олардың 60%-ында полиция тиісті шара қолдана алмаған. Себебі полицейлер оқиға орнына барғанда жәбірленушілер өтініш беруден бас тартқан", - деді министр.

Министр қазіргі қолданыстағы заң бойынша арыз-шағым болмаса зәбір көрсетушілердің жауапқа тартылмайтынын айтты. Осы жылы отбасылық-тұрмыстық  668 қылмыс жасалған. 

"Бұның салдары жүгенсіздікке, бассыздыққа әкеп соғып жатыр. Қол жұмсау әдетке айналуда.Тұрмыстық зорлық-зомбылық проблемасын тек күштеу, мәжбүрлеу шарасымен шешу мүмкін емес", - дейді Марат Ахметжанов. .

Министрдің айтуынша, полицияның қылмыстық немесе әкімшілік шаралары – тек салдармен күрес.

“Бұл жағдайдың түпкі тамыры – әлеуметтік проблемалар. Атап айтқанда, әлеуметтік тұрақсыздық, маскүнемдік, нашақорлық, психикалық ауру, құмар ойындармен әуестену, моральдық-адамгершілік құндылықтың әлсіреуі. Сондықтан, бұл мәселені шешу үшін барлық мүдделі мемлекеттік органдар, әкімдіктер, үкіметтік емес ұйымдар, барлық қоғам болып атсалысу керек", - деді Марат Ахметжанов.

Айта кетсек, жыл басынан бері тұрмыстық зорлық-зомбылық бойынша 35 мың әкімшілік хаттама толтырылған. Оның ішінде 10 мыңнан астам адам қамауға алынса, 8,5 мың адамға ескерту беріліп, 675 адамға айыппұл салынды.