"Жауапкершілікке тартылады": Ерлан Қарин Алматыдағы "Ирина Кайратовна" мен Shiza-ның концертіне қатысты пікір білдірді
Мемлекеттік хатшы Ерлан Қарин Алматыдағы Балуан Шолақ атындағы спорт сарайында болған концерттегі оқиғаға қатысты пікір білдірді, деп хабарлайды Stan.kz ақпарат агенттігі.
Қарин концертті NS group ЖШС ұйымдастырғанын атап өтті.
"Алматы қаласындағы концерт кезінде болған оқиға қазір қоғамда қызу талқыланып жатыр. Біздің білуімізше, концертті NS group ЖШС ұйымдастырған. Shiza лақап атын иеленген азаматтың Мемлекеттік туға қатысты әрекеті жіті тексеріліп, оқиғаның мән-жайы анықталуы қажет. Концертте ішімдік ішілгендіктен мұндай әрекетке жол берілген деп ойлаймын. Жастар осы бір келеңсіз оқиғадан сабақ алып, қарапайым мәдениет пен этикетті меңгеруі қажет", – деді мемлекеттік хатшы.
Сонымен қатар, Қарин мұндай ауқымды іс-шараларды ұйымдастырушылар да жауапкершілікті сезінуі керегін атап өтті.
- "Ирина Қайратовна" тобының мүшесі: Қазақтың рухын көтеру үшін шындықты әдемі түсіріп беру керек екен
"Олар концерт ұйымдастырған кезде ішімдік ішілуіне жол бермеуге, басқа да оқыс оқиғалардың алдын алуға тиіс. Біз мемлекеттілігіміздің, Тәуелсіздігіміздің символы саналатын Мемлекеттік туға зор құрметпен қарауымыз қажет. Оны аяқасты етуге жол бермеуіміз керек. Туымызды немесе басқа да рәміздерімізді қорлаған әрекеттер құқықтық-нормативтік актілерге сәйкес жауапкершілікке тартылады. Себебі, заң баршаға ортақ. Еліміздің әрбір азаматы Мемлекеттік туды құрметтеп, қастер тұтуы қажет деп санаймын", – деді Ерлан Қарин.
Бұдан бұрын "Ирина Кайратовна" тобының мүшесі мен көпшілік Shiza деп танитын Асхат Жолшиевтің Алматыдағы концерт кезінде Қазақстанның туын алып шығып, бейәдеп қылық көрсеткенін жазған болатынбыз.