Хакерлер ЖИ-дың көмегімен Instagram аккаунттарды бұзып кірді

Хакерлер Meta AI чат-ботымен Instagram-дағы өзге пайдаланушылардың аккаунттарын бұзып кірген. Компания өкілдері мәселенің шешілгенін айтты. Бұл туралы Stan.kz ақпарат агенттігі хабарлайды.

Қаскөйлер чат-боттың осалдығын пайдаланып, өздерінің орналасқан жері туралы мәліметтерді қолдан өзгерткен.

Кейін олар жасанды интеллекттің көмегімен бөгде Instagram аккаунттарының құпиясөзін өзгертіп, аккаунтқа тіркелген электрондық пошта мекенжайын өздерінкіне ауыстырған.

Хакерлердің әрекетінен соңғы күндері қанша аккаунт зардап шеккені әзірге белгісіз. Алайда олардың арасында АҚШ-тың бұрынғы президенті Барак Обама қолданған расталған аккаунттың болғаны айтылды.

Бұл мәселе туралы алғашқылардың бірі болып Meta компаниясының бұрынғы қызметкері Jane Manchun Wong мәлімдеді. Оның айтуынша, аккаунтының құпиясөзі өзінен рұқсат сұралмай өзгертілген. Сонымен қатар бір күн бойы оған құпиясөзді қалпына келтіруге қатысты көптеген хабарламалар келіп тұрған.

Meta компаниясының өкілі Энди Стоун Мәселе толықтай шешілгенін айтты. Алайда ол әлемдік көшбасшылардың аккаунттары бұзылғаны туралы ақпаратты растаудан бас тартты.

Өткен аптада Еуроодақтағы әлеуметтік желі қолданушыларының шағымдарын қарайтын тәуелсіз орган Meta компаниясы аккаунттары негізсіз бұғатталды деп есептейтін пайдаланушылардың өтініштеріне іс жүзінде жауап бермейтінін мәлімдеді.