Ұлан Қонысбаев 10 жылдан кейін алаңға оралды

Ауыр жарақаттан кейін үлкен футболдан алыстап кеткен қазақстандық футболшы Ұлан Қонысбаев қайтадан алаңға шықты. "Тараз" сапында өткен матчта жанкүйерлер оны зор қошеметпен қарсы алды. Бұл туралы Stan.kz ақпарат агенттігі хабарлайды.

Ұлан Қонысбаев 10 жылдан кейін футбол алаңына қайта оралды. Оқиға Жамбыл облысынан асып, бүкіл қазақстандық футбол жанкүйерлерінің назарын аударды.

Бірінші лиганың 7-туры аясындағы Тараз бен Арыс арасындағы матчта аңызға айналған жамбылдық жартылай қорғаушы қайтадан туған алаңында өнер көрсетті. Бас бапкер Руслан Есатов Қонысбаевты ойынның 83-минутында алаңға шығарып, трибуналар оны зор қошеметпен қарсы алды.

Оқыңыз

Шахмұрат Мұтәліп Шымкенттің "Ордабасы" футбол клубын қаншаға сатып алатыны белгілі болды Оқыңыз  

Қазақстан футболы үшін Қонысбаев жай ғана фамилия емес. Ол өз буынының ең мықты жартылай қорғаушыларының бірі саналған. Алайда 2016 жылы Қазақстан мен Қытай құрамалары арасындағы матчта ауыр жарақат алып, мансабы тоқтап қала жаздады. Сол кездесуде футболшы оң аяғын ашық сындырып, стадионнан бірден ауруханаға жеткізілген еді.

Ойын кезінде оның жанында Самат Смақов, Танат Нүсербаев және Давид Лория болған. Қатты күйзеліске қарамастан, Қазақстан құрамасы сол матчта 1:0 есебімен жеңіске жеткен еді.

Жарақаттан кейін көпшілік жамбылдық вингердің мансабына күмәнмен қарады. Ұзақ оңалту кезеңі, ойын тәжірибесінің болмауы және үлкен футболдан алыста өткен жылдардан кейін Қонысбаев қайтадан алаңға оралды. Бұл сәт биылғы маусымдағы ең әсерлі оқиғалардың біріне айналды.

Оның допқа әр тиген сәтін жанкүйерлер қолдап отырды, ал әлеуметтік желі қолданушылары футболшыға жылы лебіздерін жаудырып жатыр. Матчта "Тараз" клубы да жанкүйерлерін қуантты. Команда "Арысты" 2:1 есебімен жеңіп, турнирлік кестеде үшінші орынға көтерілді.