Украинада оппозиционер Айдос Садықты атып кетті
Наталья Садыкова желідегі парақшасында күйеуі Айдосқа қастандық жасалып, өз үйінің маңында оны атып кеткенін мәлімдеді. Бұл туралы Stan.kz ақпарат агенттігі хабарлайды.
Фото Наталья Садыкованың желідегі парақшасынан
"Бәсе" Youtube-арнасының авторы Айдос Садыққа белгісіз біреу көлікте отырған жерінде оқ атқан. Ақпаратты оның жұбайы Наталья Садықова да растап отыр.
“Бүгін Киевте Айдос Садықовтың өз үйінің маңында өміріне қастандық жасалды”, – деп жазылған Наталья Садыкованың жазбасында.
Strana.ua басылымы Киевте белгісіз біреу белгілі қазақстандық белсенді Айдос Садықовқа оқ атты деп, құқық қорғау органдарындағы дереккөзді келтірді.
Оқиға 18 маусым күні түс ауа Киевтің Шевченков ауданында болған. Садықов әйелі екеуі көлікке жақындаған кезде белгісіз біреу оқ атқан. Әйелі зардап шеккен жоқ, ал ер адамның жағдайы әзірге белгісіз.
Еске салайық, Айдос Садықов 2014 жылдан бері Киевте тұрады және Қазақстанның қазіргі билігін, оның ішінде қазіргі ел президентін қатты сынаған. Ол 2022 жылдың қаңтарында болған Қазақстандағы наразылық акцияларын белсенді түрде қолдаған еді. Желідегі арнасында Айдос Садық "Кремль агенттері" туралы видео жариялаған. 2023 жылы Айдос Садыққа іздеу жарияланған еді.