Төтенше жағдайлар министрлігінің бірнеше лауазымды тұлғасы пара алды деп айыпталды
Сыбайлас жемқорлыққа қарсы қызмет Төтенше жағдайлар министрлігі бөлімше басшыларының заңсыз әрекеттерінің жолын кесті. Жемқорлыққа қарсы іс-қимыл агенттігінің төрағасы Асхат Жұмағали жартыжылдық қорытынды отырысында осылай деп мәлімдеді. Бұл туралы Stan.kz ақпараттық агенттігі хабарлайды.
Оның айтуынша, жасырын іс-шаралардың нәтижелері бойынша ТЖМ Өртке қарсы қызмет комитетінің төрағасы, сондай-ақ Шымкент қаласы мен Жетісу облысы бойынша ТЖД бастықтары парақорлықпен әшкереленді.
"Олар өртке қарсы қауіпсіздік саласындағы қамқорлығы үшін кәсіпкерлерден жүйелі негізде пара алып, тексерілетін ұйымдарды келісімшарттар жасау арқылы олардың қызметтерін сатып алуға және уақтылы ақы төлеуге мәжбүрлеген деген күдікке ілінді",- делінген хабарламада.
Пара көлемі 100 мыңнан 4 млн теңгеге дейінгі аралықты құрайды.
Бұдан басқа, ТЖМ Өртке қарсы қауіпсіздік комитетінің төрағасы заңсыз ақшалай сыйақы үшін Ұлытау облысы бойынша ТЖД басшыларының біріне қамқоршылық жасаған. Күдіктілер ұсталып, уақытша ұстау изоляторына қамалды.
Сотқа дейінгі тергеу жалғасып жатыр. Аталған лауазымды тұлғалардың басқа да жемқорлық құқықбұзушылықтарға қатысының бар-жоғы тексеріледі.