"Полицейді сүйрей бастады. Соққыға жығып, асфальт бетінде сүйреді. Біреуі таяқпен ұрса, екіншісі теуіп жатты. Неліктен мұншалықты қорлады? Форма киіп, бекетте тұрғаны үшін бе? Бұдан кейін ол аман қала ма? ", – дейді Беріктас ауылының тұрғыны Светлана Мынбаева.

5 қаңтарда бір топ адам облыстық әкімдік ғимаратына басып кіріп, екінші қабатты өртеп жіберген. Ашулы адамдарды суатқыш пен түтіндету гранатасы да тоқтата алмаған. Мұнымен қоса полицейлер мен ұлттық ұлан сарбаздарына қарай тас лақтырылған. Осындай тастардың бірі 18 жастағы сарбаз Айбат Амановқа тиген. Екі ай бұрын ғана әскерге шақыртылған ол сол жерде мерт болған.

"Біз бірге әскерге шақыртылдық. Пойызда бір-бірімізге аман-есен үйге қайтамыз деп уәде берген едік. Өзге сарбаздар сапта тұрғанда бір қадам да шегінбегенін айтты. Барлығын жігерлендірген. Жаралыларды әкеліп жатқанда Аманов Айбат қайда деп сұраған едім, көз жұмғанын естідім", – дейді Ұлттық гвардия 5514 әскери бөлімінің сарбазы Ілияс Өміржан.

Бұдан кейін тәртіпсіздікке қатысушылар Н. Назарбаевтың ескерткішін қиратып, полиция ғимаратын басып алған. Осы кезде ұрланған қару мен оқ-дәрілерді пайдалана бастапты. Ал қорғаныш ретінде әйелдер мен кәмелетке толмағандарды қолданған. Бұзақылар ҰҚК департаменті мен Nur Otan партиясының кеңсесіне, дүкендер мен сауда үйлеріне шабуыл жасаған. Сонымен қатар облыстық телеарна арқылы тікелей эфирге шықпақ болған, бірақ бұл ойлары іске аспаған соң жергілікті әуежай мен телеарна ғимаратына өрт қойған.

8 қаңтарда әскерилер қаланы толығымен өз бақылауларына алған. Қазір облыс орталығында ұрланған қару-жарақ пен тәртіпсіздікке қатысушылар іздестірілуде.

Талқылау