Таразда қыз алып қашқан екі жігіт 7 жылға сотталды
Тараз қаласының №2 сотының үкімімен Маңғыстау және Ақтөбе облыстарының тумалары қыз алып қашты деген айыппен 7 жылға сотталды. Бұл туралы Stan.kz ақпарат агенттігі хабарлайды.
Жамбыл облысы прокуратурасының хабарлауынша, 2022 жылдың көктемінде ер адам қызбен ортақ достары арқылы танысқан. Бірнеше кездесулерден кейін ол ер адаммен одан әрі сөйлесуден бас тартқан.
"Алайда, азамат Ж., қызбен некеге тұру үшін оны алып қашуды шешіп, 2023 жылдың ақпан айында Тараз қаласына келіп, өзінің досы азамат Ж.-мен бірге жоспарын жүзеге асыруға кіріскен. Олар қызды алдап, көлікке күштеп отырғызып, қаладан шығып кетпек болған. Қыздың көмекке шақырған дауысын естіген көршілері полиция шақырған", - деді Жамбыл облысы прокуратурасы.
Полицейлер жедел әрекет етіп, күдіктілерді қолға түсірген.
"2023 жылдың 21 қыркүйегінде сот үкімімен болашақ күйеу жігіт те, оның досы да Қылмыстық кодекстің 125-бабы 2-бөлігінің 1-тармағы "Адамдар тобының алдын ала сөз байласуымен адамды ұрлау" бойынша кінәлі деп танылды. "Олар 7 жылға бас бостандығынан айырылды. Үкім заңды күшіне енген жоқ", - делінген хабарламада.
Осыған орай, Жамбыл облысы прокуратурасы адам ұрлаудың нақты бас бостандығынан айыру көзделген ауыр қылмыс екенін ескертті.
"Қыз алып қашу – адам құқықтары мен бостандық және теңдіктің негізгі принциптерін бұзу", - деді ведомство.
Айта кетейік, бұған дейін Ішкі істер министрлігі "Қыз алып қашу" дәстүріне жеке қылмыстық құқық бұзушылық мәртебесін беру туралы ұсынысты қолдайтынын жазған едік.