Қазцинктегі жарылыстан зардап шеккен тағы бір жұмысшы көз жұмды

Өскемен қаласында "Қазцинк" ЖШС-дағы жарылыстан зардап шеккен жұмысшылардың бірі ауруханада көз жұмды. Бұл туралы Stan.kz ақпарат агенттігі хабарлайды.

Кәсіпорын қызметкері, 1980 жылы туған Фарафонтов 5 мамыр күні Өскемен металлургиялық алаңы аумағындағы өндірістік аймақта болған төтенше жағдай кезінде аса ауыр термиялық күйік алды. Ер адамның денесінің шамамен 90 пайызын күйік шалған. Осы уақыт бойы ол Шығыс Қазақстан облыстық мамандандырылған медицина орталығының жансақтау бөлімінде жатып, дәрігерлер оның өмірі үшін күресті.

ШҚО Денсаулық сақтау басқармасының мәліметінше, Астанадан келген бас республикалық реаниматолог Бақыт Жарқымбеков пен бас республикалық комбустиолог Жомарт Жалғаспаев науқасты санитарлық авиация арқылы елордадағы Шұғыл медицинаны үйлестіру ұлттық ғылыми орталығы мекемесіне жеткізу мүмкіндігін талқылаған.

Оқыңыз

Өскеменде зауыттағы жарылыс: "Қазцинк" қаза тапқан жұмысшылардың отбасыларына өтемақы төлейді Оқыңыз

Алайда ер адамды тасымалдау мүмкін болмапты. Ол ауруханада көз жұмды.

Бұл туралы "Қазцинк" компаниясынан мәлім етті.

"Жазатайым оқиға салдарынан ауыр жарақат алған қызметкерлердің бірі бүгін түнде ауруханада көз жұмғанын терең күйзеліспен хабарлаймыз. Марқұмның туған-туыстары мен жақындарына қайғыра көңіл айтамыз. Компания қаза болған қызметкердің отбасына қажетті қолдау көрсетіп жатыр", – делінген хабарламада.

Бүгінде өндірістік алаңда апат салдарын жою жұмыстары мен мемлекеттік органдармен бірлескен тергеу жалғасып жатыр.

"Қазіргі уақытта Өскемен металлургиялық кешені мырыш және қорғасын зауыттарындағы өндірістік қуатты уақытша төмендетіп жұмыс істеуде", – делінген ақпаратта.

Еске салсақ, 5 мамыр күні таңертең Өскемендегі "Казцинк" ЖШС-нің қорғасын зауыты аумағында, электролиз цехының балқыту бөлімінде жарылыс болып, 120 шаршы метр аумақта өрт шыққан. Сонымен қатар цехтың 220 шаршы метр аумағында құрылымдар опырылған. Құтқарушылар келген кезде цех ашық жалынмен жанып жатқан.

Оқиға салдарынан екі адам қаза тапты, балқытушы Ержан Камалиев пен жабдықтарды шебер Олжас Рамазанов. Ауруханаға бес адам жеткізілді, олардың үшеуі тексерістен кейін жеңіл жарақаттармен үйлеріне жіберілді. Тағы екі адам өте ауыр жағдайда ауруханаға жатқызылғаны хабарланған.