Соңғы жаңалықтар
Соңғы жаңалықтар

"Қазақтелекомның" пайдасы бір жылда 89%-ға жуық азайды

Қазақтелеком
Фото: Қазақтелеком сайтынан

“Қазақтелеком” компаниясы 2026 жылдың алғашқы тоғыз айындағы таза пайдасының айтарлықтай қысқарғанын хабарлады. Телеком-оператордың AIX биржасында жарияланған шоғырландырылған қаржылық есебіне сәйкес,қаңтар–қыркүйек айларындағы таза пайда 88,7%-ға азайып, 17,4 миллиард теңгені құраған. Бұл туралы Stan.kz ақпарат агенттігі хабарлайды.

 

Қаржылық көрсеткіштер қалай өзгерді?

Өткен жылдың осы кезеңімен салыстырғанда пайданың күрт төмендеуіне бірқатар фактор әсер еткен:

  • Бұрынғы активтерден түскен табыстың ықпалы: Алдыңғы кезеңдердің есептілігінде шығып қалған активтерден түскен пайда көрсетілген болатын, ал биылғы нәтижеге бұл біржолғы табыс әсер етпеген.

  • Қаржылық шығындар мен бағам айырмасы: Компанияның қаржылық шығындары 32,1%-ға өсіп, 47,6 миллиард теңгеге жеткен. Сонымен қатар есептілікте 7,7 миллиард теңге көлеміндегі таза бағамдық шығын көрініс тапқан.

  • Активтер мен қарыздар: Тоғыз айда компания активтері 5,6%-ға артып, 1 триллион 483 миллиард теңгеге жетсе, меншікті капитал 1,4%-ға өсіп, 741,4 миллиард теңгені құраған. Бөлінбеген пайда қыркүйек соңында 625,4 миллиард теңге деңгейінде қалыптасқан. Сонымен бірге қазан айына қарай компания қарыздарының көлемі 22,1%-ға көбейіп, 407,9 миллиард теңгеге жеткен.

Дивиденд пен акционерлер құрылымы қандай?

Есепті кезеңде “Қазақтелеком” акционерлерге 3,45 миллиард теңге дивиденд төлеген. Компания басшылығы топтың қызметін әрі қарай жалғастыруға ресурстары жеткілікті деп санайды.

2026 жылдың 30 қыркүйегіндегі жағдай бойынша “Қазақтелеком” акцияларының 89,5%-ы “Самұрық-Қазына” қорына тиесілі болса, қалған 10,5%-ы өзге акционерлердің қолында. Сондай-ақ есепті күннен кейін компания Firebird құрылымымен Екібастұзда “Деректерді өңдеу орталықтарының алқабын” салу жобасын іске асыру жөнінде келісімге қол қойған.

Айта кетейік, “Қазақтелеком” нарықтық құны жөнінен Орталық Азиядағы ең ірі 20 компанияның қатарына кіреді.Дегенмен биржадағы акция бағасының өсімі жағынан компания айтарлықтай нәтиже көрсете қойған жоқ.

Айнура Дарибаева
Жұма, 20 Қараша, 2026 14:51