"Қазақфильм" миллиардтаған табыс тапқанымен, таза пайдасы 353 мың теңгеден аспаған

"Қазақфильм" 2025 жылы 1,24 миллиард теңге табыс (тартылған қаражат) тапқанымен, таза пайдасы небәрі 353 мың теңгені құрады. Киностудияның кірісі негізінен мемлекеттен түскен, ал шығындары табыстан асып кеткен. Бұл туралы Stan.kz ақпарат агенттігі хабарлайды. 

Бұл бір жыл бұрынғы көрсеткіштен 19,2%-ға аз. 2024 жылы студияның бұл бағыттағы табысы 1,54 миллиард теңгені құраған.

Киностудия тапқан қаржының басым бөлігі мемлекеттік тапсырыстардан түскен. Атап айтқанда, 967,1 миллион теңге Мәдениет және ақпарат министрлігіне киноөнімдерін өткізуден, ал 274,7 миллион теңге "Ұлттық киноны қолдау мемлекеттік орталығы" арқылы ұлттық фильмдер түсіруден түскен.

Соған қарамастан, фильм түсіру мен қызмет көрсетуге кеткен шығын 1,43 миллиард теңгеге жетіп, табыстан асып кеткен. Соның нәтижесінде студияның жалпы шығыны 185,4 миллион теңгені құрады.

Бұдан бөлек, әкімшілік шығындарға тағы 970,4 миллион теңге жұмсалған. Осылайша, компанияның операциялық шығыны 1,16 миллиард теңгеге дейін өскен.

Дегенмен жыл қорытындысында бұл шығындар өзге кірістердің есебінен жабылған. Қаржылық есепте бұл қаражаттың нақты қайдан түскені көрсетілмеген. Өзге кірістер көлемі де 1,16 миллиард теңгені құраған. Салыстырмалы түрде айтсақ, 2024 жылы операциялық шығын 1,04 миллиард теңге болса, өзге кірістер 1,05 миллиард теңгеге жеткен.

Оқыңыз

"Мақсат – пайда табу емес": Мәдениет министрлігі бюджет қаржысына түсірілген фильмдердің неге шығынын өтемейтінін түсіндірді Оқыңыз

Айта кетейік, "Шәкен Айманов атындағы Қазақфильм" ұлттық киностудиясы 2006 жылдан бері акционерлік қоғам ретінде жұмыс істейді. Компания толықтай мемлекет қатысатын ұйым ретінде құрылған.

2023 жылдың қарашасында киностудияның акциялары сенімгерлік басқаруға Мәдениет және ақпарат министрлігіне берілді. Дегенмен компанияның меншік иесі өзгерген жоқ. Акциялар бұрынғыдай мемлекет меншігінде қалды.