"Оралуына бір апта қалған еді": Каспийде қаза тапқан сарбаздың әкесі ұлын еске алды
Каспийдегі оқу-жаттығу кезінде қаза тапқан үш әскери қызметкердің денесі Орал әуежайына арнайы әскери ұшақпен жеткізілді. Бұл туралы Stan.kz ақпарат агенттігі “Мой Город” басылымына сілтеме жасап хабарлайды.
БҚО әкімдігінің мәліметінше, марқұм сарбаздар Жеңіс Темірғалиев, Өмірбек Өмірзақ және Ақжайық Гилаж қарулы күштер қатарына Батыс Қазақстан облысынан шақырылған. Әскери қызметкерлердің жасы 19 бен 21 жас арасында болған.
Жеңіс Темірғалиевтің денесі Бөрлі ауданының Ақсай қаласына жеткізілген. Ал Ақжайық Гилаж Казталов ауданының Қараоба ауылындағы туған жерінде жерленеді.
Өмірбек Өмірзақтың денесі Теректі ауданының Подстепное ауылындағы туған үйіне жеткізілді.
Бүгін жас жігіт тұрған үйдің ауласында адам көп. Қаза тапқан сарбаздың ата-анасына көңіл айту үшін туыстары, достары мен отбасының таныстары жиналды.
Өмірбек Өмірзақтың денесін әскери қызметкерлер мен мемлекеттік органдардың өкілдері алып келді.
Әскери-теңіз күштері бас қолбасшысының орынбасары Арман Сатқанов сарбаздардың әскери қызметін аяқтауына сегіз күн қалғанын және үйлеріне қайту билеттері алдын ала сатып алынғанын айтты.
"Жігіттер әскери-теңіз базасының теңіз жаяу әскерлері десанттық-шабуылдау батальоны құрамында жақсы қызмет етті. Бұған дейін екі рет жаттығу өткізілген, сарбаздардың барлығы теңіз десантын түсіру жұмыстарын білген. Бұл Қазақстанның бүкіл аумағында өткен ауқымды қорытынды стратегиялық командалық-штабтық оқу-жаттығу болды. Оның бір кезеңі – теңіз десантын жағалауға түсіру еді. Алайда десанттар түсірілген күні толқын көтеріліп, сарбаздарды толқын алып кеткен. Қазір мемлекеттік комиссия құрылып, тергеу жүргізіліп жатыр. Оқиғаға қатысы бар барлық адам түсініктеме беруде. Қорғаныс министрлігі тарапынан қаза тапқан әскери қызметшілердің туған-туыстарына психологиялық және қаржылай көмек көрсетіліп жатыр", – деді Арман Сатқанов.
Марқұм Өмірбек Өмірзақ Володарка ауылындағы мектепті бітірген. Ол полиция қызметкері болуды армандаған екен. Гитарада жақсы ойнаған. Ол небәрі 19 жаста еді.
"Ұлымды 2025 жылдың 3 қазанында әскерге шығарып салдық. 5 қазанда оны қарсы алуымыз керек еді. Бірақ бұйырмады, ұлымыздан айырылып қалдық. Ол әрдайым сабырлы болатын, құқық қорғау органдарында қызмет етуді армандайтын. Өмірбек тұңғышымыз еді. Одан кейін Арсен есімді тағы бір ұлымыз бар, ол 18 жаста. Қазір бұдан артық айтарым жоқ”, – деді Өмірбектің әкесі Өмірболат Өмірзақұлы.
Марқұмдармен қоштасу рәсімі мен оларды жерлеу 26 қыркүйекте өтеді.
Каспийде аман қалған әскери қызметкерлердің бірі Ақжол Темирәлиевтің әкесі Тимур Қыдырниязов журналистерге оқиға туралы қалай білгенін айтып берді.
Тимур Қыдырниязов ұлының өткен жылдың қазан айында әскерге кеткенін және 3 қазанда үйіне оралуы тиіс болғанын айтады.
"Мен жұмыста болдым. Жұмыста жүргенде әлеуметтік желіден, Instagram-нан көрдім. Онда түрлі жаңалықтар болды. Кейін сарбаздардың ата-аналарының чатына көп хабарлама келе бастады. Ашып, қарап шығайын деп шештім. Осылайша осындай жағдай болғанын білдім", – деді ер адам.
Сарбаздың әкесі жаңалықтарды қателік шығар деп ойлаған.
"Әскерден қайтуына шамамен 10 күн қалған еді. "Мүмкін, бұл олар емес шығар" деп ойладым. Түрлі ой келді. Кейін әлеуметтік желілерден бір жігіттің жансақтау бөліміне жеткізілгенін білдім. Бірақ оның менің ұлым немесе басқа біреу екені туралы нақты ақпарат болмады. Содан жұмыстан шығып, осында қарай жолға шықтым. Жолда келе жатқанымда тізімде әскери қызметкерлердің аты-жөндері жарияланды. Сол кезде оның менің ұлым екенін білдім", – деді Ақжол Темирәлиевтің әкесі.
Қазір Ақжол Темиралиевтің жағдайы тұрақты. Таңертең ол жансақтау бөлімінен палатаға ауыстырылды.
Еске салайық, 24 қыркүйекте Маңғыстау облысында Әскери-теңіз күштерінің оқу-жаттығуы кезінде ауа райы күрт нашарлап, жел күшейген. Соның салдарынан 17 әскери қызметкерді теңізге алып кеткен. Алғашқы ресми мәліметте тоғыз әскери қызметкердің қаза тапқаны, үшеуінің құтқарылғаны хабарланған еді.
Кейін іздестіру жұмыстары барысында тағы екі әскери қызметкердің денесі табылғаны хабарланды. Осылайша, қаза тапқандар саны 14 адамға жетті. Үш әскери қызметші құтқарылды.
Оқиғаның мән-жайын анықтау және іздестіру-құтқару жұмыстарын үйлестіру үшін өңірге қорғаныс министрі Дәурен Қосанов бастаған арнайы комиссия жіберілген. Оқиғаға байланысты қылмыстық іс қозғалып, тергеу Бас прокуратураның ерекше бақылауына алынды.
Ішкі істер министрінің орынбасары Санжар Әділов Ақтау маңында әскери қызметкерлердің қаза болуына қатысты Қылмыстық кодекстің 453-бабының 2-бөлігі (Ауыр зардаптарға әкеп соққан қызметке салғырт қарау) және 465-бабы (Кеме жүргізу ережелерін бұзу) бойынша қылмыстық іс қозғалғанын мәлімдеді.
24 қыркүйек күні сағат 22:30-да Қазақстан Республикасы Премьер-Министрінің орынбасары Қанат Бозымбаевтың төрағалығымен Маңғыстау облысындағы әскери оқу-жаттығу кезінде әскери қызметкерлердің қаза болуына байланысты құрылған Үкіметтік комиссияның отырысы өтті.
Отырыста тергеу аясында ведомствоаралық жедел-тергеу тобы құрылғаны, тергеу және жедел-іздестіру іс-шараларының кешені жүргізіліп жатқаны, сондай-ақ мамандар тартылып, қажетті сот сараптамалары тағайындалғаны айтылды.
"Әскерден келген соң үйленеміз деп еді": Каспийде қаза тапқан сарбаздардың жақындары жанайқайын жеткізді
