Суық тигенде моншаға барған дұрыс па: Дәрігер маңызды ескерту жасады

Суық тигенде моншаға барып, әбден терлеп алу ауруды тезірек жеңуге көмектеседі деген түсінік бар. Әсіресе ауру енді басталғанда, осылайша вирусты ағзадан шығаруға болады деп ойлайтындар аз емес. Бірақ дәрігерлер бұл әдеттің күтпеген қауіптері бар екенін ескертеді. Ендеше, ауырған кезде моншаға бару қаншалықты қауіпті? Бұл туралы Stan.kz ақпарат агенттігі RT басылымына сілтеме жасап хабарлайды. 

"СМ-Клиника" терапевті Шота Каландияның айтуынша, моншада ағза жылуды белсенді түрде бөледі: терідегі қан тамырлары кеңейіп, тамыр соғысы жиілейді, терлеу күшейеді. Осы кезде адам термен бірге сұйықтық жоғалтады. Ал дене қызуы көтеріліп, су аз ішіліп, әлсіздік пайда болған жағдайда, бұл сусыздану, бас айналу және естен тану қаупін арттырады. Қан қысымы да өзгеруі мүмкін. Сондықтан жүрек-қан тамырлары аурулары бар адамдар ерекше сақ болғаны жөн.

Маман тердің өзі тыныс алу жолдарындағы вирустарды ағзадан шығармайтынын атап өтті.

"Тердің негізгі міндеті – денені салқындатуға қатысу. Бу бөлмесіндегі адам қауіпсіз көтере алатын температура тыныс алу жолдарындағы инфекцияны жоюға жеткіліксіз. Сондықтан қатты терлеу емнің әсер етіп жатқанын немесе аурудың тезірек жазылатынын білдірмейді", – деп ескертті дәрігер.

Мамандардың сөзінше, кейде жылы әрі ылғалды ауа мұрынмен тыныс алуды уақытша жеңілдетуі мүмкін. Алайда мұрынның ашылуы – аурудан айығу деген сөз емес және ол үшін моншаға барудың қажеті жоқ.

"Жуынғыңыз келсе және жағдайыңыз мүмкіндік берсе, ұзаққа созбай, жайлы жылы душ қабылдауға болады. Бірақ денені шамадан тыс қыздырудан аулақ болған жөн. Сондай-ақ бу жұту үшін қайнап тұрған судың үстіне еңкеюге болмайды. Бұл күйіп қалу қаупін тудырады", – деді дәрігер.

Оның айтуынша, дене қызуы көтерілмесе де, ауырған кезде моншаға бару дұрыс шешім емес.

"Мұрыннан су ағу, тамақтың ауыруы және жөтел кезінде адам инфекция жұқтыруы мүмкін. Қоғамдық моншада адамдар тек бу бөлмесінде ғана емес, киім ауыстыратын жерде, душта және демалыс бөлмесінде де байланысады. Ауа температурасының жоғары болуы айналадағыларды инфекция жұқтырудан қорғамайды. Тыныс алу жолдарының инфекциясы белгілері байқалса, үйде қалып, адамдармен байланысты шектеген дұрыс", – деп кеңес берді маман.

Дәрігер моншаға барар алдында дене қызуын түсіретін дәрілерді әдейі қабылдауға да болмайтынын ескертті.

"Қызу түсіретін дәрі адамның жағдайын жеңілдетуі мүмкін. Бірақ бұл ағзаның толық қалпына келгенін білдірмейді. Мұздай суға түсу, салқын сумен құйыну немесе денені қармен ысқылау сияқты күрт температуралық өзгерістерді де кейінге қалдырған жөн. Алкогольді ыстықпен қатар қолдану денсаулыққа төнетін қауіпті одан әрі арттырады", – деді Шота Каландия.

Оқыңыз

Дәрігер жиі жылау не ашулану ауру белгілері екенін ескертті Оқыңыз

Маманның пікірінше, моншаға аурудан толық айыққаннан кейін, жедел белгілер басылып, ағза қалыпты физикалық жүктемені қайта көтере алатын кезде барған дұрыс.

"Дене қызуының бір тәулік бойы көтерілмеуі моншаға баруға толық дайын екеніңізді білдірмейді. Әсіресе әлсіздік немесе бас айналу әлі де байқалса, сақ болған жөн. Ауырғаннан кейін моншаға алғаш барған кезде бу бөлмесінде аз уақыт болып, шамадан тыс ыстықтан және денені күрт салқындатудан аулақ болу керек", – деп түйіндеді дәрігер.