"Тәңіршілдік дін емес": Қазақстандық депутат тәңіршілдікті қолдайтындарды адасқандар деп атады
Мәжіліс депутаты Еділ Жаңбыршин тәңіршілдікті дін ретінде тану идеясына қатысты өз пікірін білдірді. Бұл туралы Stan.kz ақпарат агенттігі хабарлайды.
Фото: mazhilis_kz / видеодан скриншот
Петиция жақында Қазақстанда іске қосылған еді.
Осы тұста Жаңбыршин өзінің ислам дінін ұстанатынын айтты. Дегенмен діни сенімді таңдау әр адамның өз құқығы екенін алға тартты.
"Әркім өз зерттеулерінің, ізденісінің, сенімдерінің нәтижесінде дінді өзі таңдайды. Ең бастысы дін терроризм мен экстремизмнің құралы болмауға тиіс. Дінді саяси құралға айналдыруға болмайды. Ол қоғамда дау тудырмауы керек. Егер мұндай белгілер болса, онда бұл дін емес. Бізде тиісті мемлекеттік органдар бар. Олар петиция мен ұсыныстарға өздері жауап беріп, қарастырады", – деді депутат.
Жаңбыршин сонымен қатар тәңіршілдікті дінге жатқызуға болмайтынын атап өтті. Ол осы ағымды ұстанушыларға мәселені мұқият зерттеуге кеңес берді.
"Шындығында, тәңіршілдік дін емес. Біздің ата-бабаларымыздың діні – ислам. Сондықтан олар адасуы мүмкін. Мұқият зерттесін. Қожа Ахмет Яссауи, Бекет ата, Шәкәрім қателескен жоқ деп ойлаймын", – деп жауап берді Жаңбыршин.
Ол дау тудырмай, қоғамды біріктіретін мәселелерге назар аудару керек екенін алға тартты.
Еске салсақ, Желіде тәңіршілдікті дін ретінде тануды талап ететін петиция пайда болған еді.