Қаратауда саябақ салуға бөлінген 148 миллион теңге қолды болған
Жамбыл облысының Қаратау қаласында құрылысы төрт жыл бұрын басталған саябақтың жұмыстары әлі де аяқталмаған. Жергілікті биліктің айтуынша, бұған бюджет қаражатының ұрлануы себеп болған. Бұл жөнінде Stan.kz ақпарат агенттігі Хабар24 арнасына сілтеме жасап хабарлайды.
Моноқалаға кіре берістегі гектардан астам аумақта субұрқақ салып, орындықтар мен флагшток орнатылуы тиіс болған. Бірақ қазір саябақ қараусыз қалды, кіреберіс арканың іргетасы жарылып, су құбырлары жарамсыз болып қалған.
Жергілікті биліктің мәліметінше, Қаратау қаласын абаттандыруға бөлінген 148 миллион теңге бюджет қаражатының ұрлануынан саябақ құрылысы аяқталмай қалған. Сондықтан құрылыс тоқтатылып, қылмыстық іс қозғалып, кінәлілер жазаланды, дейді олар.
- Қазақстанда жемқорлардың тізімін жариялау мақсатында арнайы сайт ашылмақ
- Шетелден алынған үйлер мен виллалар: Сыбайлас жемқорлыққа қарсы агенттік мемлекетке қайтарылған активтерді көрсетті
Жақында ғана жергілікті билік жұмысты жалғастыруға рұқсат алды. Қаржы келесі жылы түседі.
“Осы саябақты қалпына келтіруге тұрғындардан көптеген өтініштер түсіп жатыр. Бізге құрылыс жұмыстарын жалғастыруға рұқсат берді. Енді жобалық-сметалық құжаттарды әзірлеп, аудандық бюджетті жоспарлау бөліміне өтінім береміз. Қаржы бөлінгеннен кейін жұмысты жалғастырамыз”, – дейді Қаратау қаласының әкімінің орынбасары Ұлан Сәрсенбек.