Соңғы жаңалықтар
Соңғы жаңалықтар

"Бетіме күле қарап, ештеңе дәлелдей алмайсың деді": Шығыс Қазақстан облысында өгей әке 13 жастағы қызын бес жыл бойы зорлап келген

Шығыс Қазақстан облысының тұрғыны 13 жастағы қызын күйеуінің бес жылдан бері зорлап келгенін мәлімдеп, президенттен көмек сұрады, деп хабарлайды Stan.kz ақпарат агенттігі. 

Фото: Скриншот видео

Келіншектің айтуынша, ол 2016 жылы екінші рет тұрмыс құрған. Отау құрғаннан кейін күйеуі оны үнемі соққының астына алған. Әйелдің үндеуін адвокат Айман Омарова өзінің Facebook парақшасында жариялады. 

“Құрметті Қасым Жомарт Кемелұлы! Сізге үш баланың анасы, Шығыс Қазақстан облысы Ұлан ауданының тұрғыны ретінде жүгінемін. 2016 жылы мен кішкентай қызымның өгей әкесімен некеге тұрдым. Ол уақытта қызымның жасы небәрі 8 жаста болған. Бес жыл бойы күйеуім мені үнемі қорлап, ұрып-соғатын. Соның кесірінен бірнеше рет ауруханаға да түстім. 2022 жылдың 9 қаңтарында ол маған тағы да қол көтерді, салдары ауыр болғаны сонша, мен есімнен танып қалғанмын. Жасы 13-ке келген қызым мені көз жұмды деп ойлап, анама қоңырау соққан. Анам бірден келіп, мені жедел-жәрдемге салып, балаларды өзімен алып кетті”, – дейді ол. 

Дәл сол уақытта әйелдің қызы әжесі мен тәтесіне сұмдық жайттың бетін ашқан. Ол өгей әкесінен 8 жасынан бастап азғындық көргенін айтқан. Ер азамат 5 жыл бойы кішкентай қызға зорлық-зомбылық көрсетіп келген. 

"Ол қызымды “болған жайтты біреуге айтатын болсаң, анаң мен сені өлтіріп тастаймын” деп қорқытқан. Сол үшін қызым ешкімге тіс жармай келіпті. Соңғы рет ол мұндай әрекетін 2022 жылдың 7 қаңтарында фермаға алып кетіп жасаған. Мен 16 қаңтар күні Ұлан аудандық полицияға арыз жаздым. Процессуалдық прокурор мен психологтың қатысуымен болған жауап алу кезінде прокурор мен психологтың қатысумен тергеуші Шумақбаеваның сұрақтарына жауап берген уақытта қызым тағы да бір сұмдық жайт туралы айтып берді. 10 жаста болғанда оған өгей әкесі диванда жатқан жерінен зорлық әрекеттерін жасаған. Ол денесі ауырғаннан кейін, айқайлап қашып құтылуға тырысқан. Бірақ күйеуім оны әбден қорқытқан. Мен үйде жоқ кезде оған ылғи тиісіп отырған. Осы оқиғалар жанына батқаннан кейін қызым жазда суға батып өлмекші болыпты. Оның қызыма жасаған осындай сұмдық әрекеттерден кейін баланың ішегіне ауыр зақым келген. Қазіргі таңда ол дәретке отыра алмай қиналады", – дейді келіншек.

Әйелдің айтуынша, осы істегендерінен кейін құқық қорғау органдары тиісті шара қабылдамағанын, тіпті қыздың өгей әкесі күдікті деп те танылмағанын айтады.

“Біздің бетімізге күле қарап, ешнәрсені де дәлелдей алмайтынымызды айтады. Оның прокуратурада танысы бар. Дәлірек айтқанда, оның досы әрі сыныптасы Қалмаханов Бауыржан бірінші күннен бастап осы істің артында тұр”, – дейді әйел.

Осы оқиғаға қатысты Шығыс Қазақстан облысы полиция департаменті пікір білдіріп, қылмыстық істі тергеу барысы бақылауда екенін хабарлады.

“Бұл іс бойынша тергеуді жыныстық азғындыққа қарсы қылмыстарға, оның ішінде кәмелетке толмағандардың ісіне мамандандырылған тергеу басқармасының аға тергеушісі жүзеге асырады. Қазіргі уақытта істің мән-жайларын зерттеудің жан-жақтылығын, толықтығын және объективтілігін қамтамасыз ету үшін дәлелдемелерді бекітуге бағытталған қажетті тергеу әрекеттері жүргізілуде. ҚР Қылмыстық-процестік кодексiнің 99-бабына (Қылмыстық процеске қатысушылардың өтiнiшхаттарын қараудың мiндеттiлiгi) сәйкес қылмыстық процеске қатысушылар сотқа дейінгі тергеп-тексеруді жүзеге асыратын адамға процестік әрекеттерді жүргізу немесе процестік шешімдер қабылдау туралы өтінішхаттармен жүгінуге құқылы”, – делінген хабарламада. 

Талқылау