Мэнни Пакьяо спорттық мансабын қайта жалғастырады

Фото: epa/vostock-photo

Аңызға айналған филиппиндік боксшы Мэнни Пакьяо 46 жасында кәсіби рингке қайта оралатынын ресми түрде мәлімдеді. Бұл туралы Stan.kz ақпарат агенттігі хабарлайды.

Ол 2025 жылдың шілде айында WBC нұсқасы бойынша жартылай орта салмақтағы әлем чемпиондығы үшін америкалық Марио Барриосқа қарсы титулдық жекпе-жек өткізеді.

Пакьяо – тарихтағы сегіз түрлі салмақ дәрежесінде чемпиондық белбеу иеленген жалғыз боксшы. Ол мансабын 2021 жылы Йорденис Угасқа қарсы жеңілістен кейін аяқтаған еді. Кейінірек көрме кездесулеріне қатысқаны болмаса, ресми жекпе-жектер өткізбеген. 2024 жылы жапондық кикбоксшы Рукия Анпоға көрме жекпе-жегінде жеңіліп, оның рингке қайта оралуы жайында күмәндар туындаған болатын. Алайда Пакьяо Невадада медициналық рұқсат пен лицензия алып үлгерді.

WBC президенті Маурисио Сулейман бұл жекпе-жек шілде айында өтетінін растады. Оның айтуынша, ұйым ережелері бойынша аты аңызға айналған чемпиондарға зейнеттен кейін тікелей титулдық кездесуге оралуға мүмкіндік беріледі. Мұндай жағдай 1987 жылы Шугар Рэй Леонардпен де болған.

Пакьяоның қарсыласы – 29 жастағы америкалық Марио Барриос. Ол жартылай орта салмақтағы WBC чемпионы және Терренс Кроуфорд бұл салмақтан кеткен соң толық чемпион атанған. Барриостың кәсіби рекорды – 29 жеңіс, 2 жеңіліс және 1 тең матч.

Бұл жекпе-жек Пакьяоның спорттағы керемет мансабын биік деңгейде аяқтау мүмкіндігі болмақ. Көптеген жанкүйер бұл кездесуді асыға күтіп отыр, себебі ол спорт тарихындағы ең жарқын камбэктердің бірі болуы мүмкін.