"Лас әңгімеге араластырмаңыздар": Ләйлә Сұлтанқызы "Балапан" телеарнасының айналасындағы дауға қатысты пікір білдірді

Танымал тележүргізуші Ләйлә Сұлтанқызы “Балапан” телеарнасының айналасындағы дауға қатысты пікір білдірді. Бұл туралы Stan.kz ақпарат агенттігі хабарлайды.

Күні кеше қазақстандық актер Нұрғали Нұғман бірнеше жыл бұрын “Балапан” телеарнасында жұмыс істеп жүргенінде продюсер тарапынан зорлық көргенін мәлімдеген еді. Бұл оқиға желіде дау тудырып, қазақстандықтар ұлттық телеарнаға бойкот жариялауға шықты. Журналист Ләйлә Сұлтанқызы да Threads желісінде жазба жариялады.

Оның айтуынша, “Балапан” арнасын дәлелсіз дауға араластырудың қажеті жоқ. Ол бір адамның сөзіне сүйеніп, бүкіл арнаның жұмысына және қызметкерлеріне көлеңке түсіру дұрыс емес деп санайды.

“Балапан арнасына көптеген компания аутсорсер болып, түрлі хабарлар, сериалдар, мультфильмдер түсіреді. Әр аутсорсер компанияда ондаған, жүздеген адам еңбек етеді. Арна қызметкерлері барлығын танымауы қалыпты жағдай. Арна – тапсырыс беруші, ауторсер компания тапсырылған жұмысты келісім-шарт аясында орындаушы ғана”, – деп жазды ол.

Ләйлә Сұлтанқызының сөзінше, ол телеарнада 2012-2016 жылдары қызмет еткен. Оның айтуынша, сол кезеңде ер продюсерлер аз болған және олардың көбі штаттан тыс жұмыс істеген.

“Егер жәбірленуші кінәліні біліп, шынымен жазалануын қаласа, бірінші, арыз жазылып, іс қаралар еді. Жалпы айналысатын жауаптылар бар ғой”, – деп жазды ол.

Тележүргізуші бұл жағдайға қатысты өзін белгілеуді доғаруды сұрады.

“Мені белгілей берудің қажеті жоқ. Жұмыстан бөлек, танитын-танымайтын әріптестердің жеке өміріне, не істеп жүргендеріне араласпағанмын, жеке шекараларынан аттамағанмын”, – деп жазды ол.

Оқыңыз

“Досы зорлық жасағанда қарап тұрған”: Қазақстандықтар рэпер De Lacure-ға бойкот жариялады Оқыңыз

Мән-жайы

Қазақстандық актер Нұрғали Нұғман мәлімдеме жасады. Актердың айтуынша, ол балалар арнасында продюсер болып жұмыс істеген сол туысының көмегімен кино мен сериалдарға түсе бастаған. Бір түсірілім күнінен кейін әлгі ер адам актерды кабинетінде алып қалып, сексуалдық сипаттағы зорлық көрсеткен.

"Мен ол кезде кішкентай бала болдым. Қорыққаным соншалық, не істерімді де білмедім. Ол істейтінін істеп болған соң “Егер біреуге айтсаң, енді кино мен сериалдарға түсе алмайсың” деп қорқытты. Осылайша бұл біздің құпиямыз болып қалды", – дейді ол.

Актердің сөзінше, бұл жағдай оған ауыр психологиялық соққы болып, тіпті суицид жасауға дейін жеткізген. Алайда қазір ол осы оқиға туралы ашық айтуға шешім қабылдаған.